Rokstu sagataveja: portals lakuga.lv

Latvejis etnoroka veterani “Laimas Muzykanti” itūgod svietej 30 godu skotivis darbeibys jubileju. Par gūdu itai nūtikšonai izdūta grupys vysu laiku popularuokūs dzīšmu izlase “”Laimas Muzykanti” 30 – zalta dzīsmis”, informej grupys puorstuove Ieva Kļava.

Grupys dybynuotuojs i liders Artūrs Uškāns par izlasi stuosta: “Itys zalta dzīšmu albums ir breineigs veids, kai apkūpuot 30 godūs padareitū. Albumā izalaseitys popularuokuos “Laimas Muzykantu” dzīsmis, kas itūs godu laikā īkaruojušys klauseituoju sirds kai Latvejā, tai daudzuos pasauļa vaļstīs. Izlasi veiduojom, bolstūtīs vairuokūs faktorūs. Vysupyrma, mums kotru godu straumiešonys vītnēs (kai “Spotify” i c.) ir pusūtrys miļjons klausejumu, izalasejom klauseituokuos dzīsmis nu itūs vītņu. Beja ari īškejuo aptauja grupys dalinīku vydā. Vēremēs, kurys dzīsmis koncertūs izraisa vyskvāluokuos emocejis. Tys beja ilgs i ryupeigs atlasis dorbs, nivīna dzīsme izlasē nav tykuse najauši. Niu, sovā 30 godu jubilejis goda kruošņajā izskaņā asam prīceigi pīduovuot sovim uztycamajim klauseituojim Latvejā i cytur pasaulī itū albumu.”

Juodasoka, ka “Laimas Muzykantu” dzīsmis sovom horeografejom izmontuojuši daudzi Latvejis i ari cytu zemu deju meistari. Eipaši populara, jau par sova veida klasiku Latvejis doncuotuoju vydā ir palykuse deja, kas radeita, par pamatu jamūt dzīsmi “Meitu muote”. Ari itei dzīsme ir īkļauta izlasē.

“Laimas Muzykantu” 30 godu jubileja tiks svieiteita divejūs eipašūs koncertūs. Pyrmais nu tūs nūtiks 2025. gods 6. decembrī Latgolys viestnīceibā “Gors”, bet ūtrys koncerts nūtiks Reigā, VEF Kulturys pilī 2026. gods 20. janvarī. Koncerti paradzāti kai sirsneiga muzykala sasatikšona ar sovim klauseituojim i bejušajim grupys dalinīkim. Gaidomi eipašī gosti – Olga Rajecka, Kristīne Kārkle-Kalniņa, Inga Zeile, Baiba Ērgle – muzikis, ar kurom grupai bejuse rodūša i skaista sadarbeiba daudzu godu garumā. Koncertā varēs dzierdēt jau īmeiļuotuos dzīsmis, taipat paradzāti ari muzykali puorsteigumi. Tymūs ari byus vareiba nūpierkt izlasi “”Laimas Muzykanti” 30 – zalta dzīsmis” kompaktdiska formatā.

30 godu garumā grupys “Laimas Muzykanti” sastuovs vairuokys reizis puorsamejs. Itūšaļt grupys kūdulu veidoj tuos dybynuotuojs i liders Artūrs Uškāns (bolss, akordeons, garmane, dūdys, kūkle, stabulis i c.), Diāna Logina (bolss, mandolina, stabulis), Inga Zeile (bolss, vejūle), Armands Varslavāns (gitarys), Matīss Uškāns (bungys) i Kristaps Strods (basgitara).