Rokstu sagataveja: portals lakuga.lv

2026. gods 25.–27. aprelī Latgolys pūdnīku dīnys svieteis 45. jubileju. Par gūdu itai nūtikšonai “Latgolys fotografu bīdreiba” kūpā ar Rēzeknis nūvoda tautys lītiškuos muokslys studeju “Rēzeknes apriņķa pūdnīki” taisa fotokonkursu “Latgales podnieki laika ritumā”, kurā aicynoj Latvejis fotomuokslinīkus – kai amaterus, tai profesionaļus – īsyuteit fotografejis, lai apkūpuotu Latgolys pūdnīku dzeivis i darbeibys nūtikšonys vysaidūs laikūs i sataiseitu izstuodi.

Ideja par konkursu roduos fotografam Igoram Pličam, par tū jis stuosta tai: “Pastuosteju ideju sovim bīdrim, jī mani atbaļsteja. Iz jubileju gribīs popularizēt pūdnīkus. Sasazynuoju ar Andri Ušpeli, ari jis ar bīdreibu lobpruot atsasauce itai idejai. Niu tik juogaida biļdis, cyta storpā, vīns fotografs nu Bauskys jau atsyuteja. Dūdam divejus mienešus biļžu īsyuteišonai. Pa tū laiku izveiduosim žūreju, sagataveisim bolvys i nūdrukuosim dorbus. Pagaidom vys nav skaidrys par finansialū pusi, biļžu drukai byus vajadzeiga ari nauda. Vys jau pīsadaleisim kaidā projektu konkursā.”

“Es daudzi struodoju ar Juoņa Gleizda arhivu, tī ari radzu biļdis ar pūdnīkim. Jis daudzi ir gastejs pi Vinceviča. Breivā šaļtī īsaveru Facebook, kur īraudzeju, ka Pūdnīku dīnom jubileja. Tai i roduos ideja, ka nazkas juopadora pūdnīku atbolstam. Maņ pošam beja daudzi kas arhivūs, tok pūstā aizguoja muns pīcu terabaitu cītais disks, bet nazkū salaseišu,” dasoka Igors.

Golvonais izstuodis kurators ir Andris Ušpelis, par izstuodis vītu i laiku tiks ziņuots vāluok, tok tuos izstuodeišona varātu nūtikt Lūznovys muižā, sasadorbojūt ar Rēzeknis nūvodu. Organizatori tur nūceju, ka byus lela fotografu atsauceiba. Ka byus daudzi interesantu i ari viesturysku materialu, nu apkūpuotuo materiala kod nabejs varātu tikt nūdrukuots ari kaids īspīddorbs, tok cikom kas tei ir tikai ideja.