Rokstu sagataveja: portals lakuga.lv

Deļkuo Latgolā tryukst jaunūs uorstu i kai slimneicys regionā rauga situaceju maineit? Raidejumu cykla “Latgolys susātivs – turpynuojums” 4. raidejumā tiks diskutāts par itim i cytim svareigim vaicuojumim kai ar slimneicu puorstuovim, jaunajim uorstim i rezidentim, tai ari ar Veseleibys ministreju. Raidejumu varēs vērtīs jau itū sastdiņ, 6. decembrī, kanalā TV24 17 stuņdēs, ar atkuortuojumu svātdiņ, 7. decembrī, 10.30 stuņdēs. Taipoš ari pyrmūdiņ, 8. decembrī, kanala ReTV vierszemis apraidē, Latgolys regionalajā televizejā 17.30 stuņdēs.

Raidejums īsavērs diveju uorstnīceibys īstuožu – Kruoslovys slimneicys i Daugovpiļs regionaluos slimneicys – kasdīnā, kab saprostu, ar kaidom gryuteibom veseleibys apryupē regionā sasadur itūšaļt. Daugovpiļs regionaluos slimneicys vadeituoja Inta Vaivode skaidruos, kai itūšaļt atsateista regionaluo slimneica, eipaši izceļūt onkologiskūs slimeibu uorstiešonu, kas regionā skaitoma kai vīns nu iztryukstūšuokūs pakolpuojumu resursu i specialistu deļ. Sovpus Kruoslovys slimneicys vadeituojs, golvonais uorsts Aleksandrs Jevtušoks kūpā ar vītneicu, uorsti Jelenu Ogorelovu īpazeistynuos ar pādejuo laika uzlobuojumim pakolpuojumūs, taipoš ari izaicynuojumim personalā, kas jau ilguokus godus ir namaineiga suope – daudzim darbinīkim tyvojās pensejis vacums, tok jaunus aizvītuotuojus atrast ir gryuši. Vaicuojumim – deļkuo jaunī uorsti i specialisti piec studeju bīžuok izalosa Reigu i kas byutu juodora, kab jūs motivātu atsagrīzt i palikt struoduot regionā – dagrīzs eipašu viereibu, pīredzi izzynojūt nu jaunuos specialistis – hematologis Danas Cmakys, taipoš ari rezidenta onkokirurgejis specialitatē Armanda Rimšāna Daugovpiļs regionalajā slimneicā.

Taipoš raidejumā runuos ari par pakolpuojumu daīmameibu – kur veidojās garuokuos ryndys, kaidu specialistu Latgolā itūšaļt izteikti tryukst i kai pakuopeniski teik uzlobuota pacientu apryupe. Raidejums meklēs atbiļdis iz byutyskuokū – kai atteisteit kvalificātu jaunū paaudzi medicinā i pošus pakolpuojumus, kab veseleibys apryupe regionā palyktu modernuoka, daīmamuoka i ilgtspiejeiguoka. Pa asūšū situaceju, statistiku i skotu iz prīšku komentēs Veseleibys ministrejis puorstuovs Oskars Šneiders.

Projekta “Latgolys susātivs – turpynuojums” mierkis ir sataiseit pīcu televizejis raidejumu cyklu, kas byutu turpynuojums jau īprīšk veiduotajam raidejumu cyklam latgalīšu volūdā “Latgolys susātivs” par aktualim problemvaicuojumim Latgolā. Raidejumūs tiks aktualizātys i analizātys sabīdryskai svareigys temys, kai bezdorbs i tuo cālūni, inflaceja regionā, izaicynuojumi medicinys nūzarē, turysma atteisteiba i izgleiteibys reformys sakys. Nūsaukumā latgaliskais vuords “susātivs” latvyski nūzeimoj “ēna”, i tys simboliski paruoda raidejuma golvonū ideju – īsavērt realuos vidis “susātiva pusē”, kab maklātu problemu cālūņus i skaidruojumu. #SIF_MAF2025

Raidejumus piec tūs puorraidis varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus LRT socialūs medeju vītnēs, kai ari e-postā lrt.zinas@inbox.lv voi zvonūt/rokstūt iz t. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgolys susātivs – turpynuojums” saturu atbiļd SIA “Latgales reģionālā televīzija”. #SIF_MAF2025

Publikaceju apmoksoj Latgolys regionaluo televizeja