Roksta autore: Indra Koroļonoka

Catūrtdiņ, 4. decembrī, Lūznovys muižā i tīšraidē škārsteiklā varēja pīdzeivuot literaruo konkursa “Latgolys prozys skaitejumi 2025” nūslāguma pasuokumu, kas beja vīna nu literaturys festivala “Prozas lasījumi” nūtikšonu. Ituo gods konkursā beja seši finalisti, nu kurūs par lobuokuo dorba autori tyka pīzeita Ligija Purinaša ar romana “Sieviete” fragmentu.

Latgalīšu kulturys kusteiba “Volūda”, sasadorbojūt ar festivalu “Prozas lasījumi”, jau sastū reizi organizēja konkursu “Latgolys prozys skaitejumi”, kura mierkis ir veicynuot literarū procesu Latgolā i pamudynuot jaunu Latgolys kulturtelpai pīdareigu debitantu dorbu tapšonu. Itūgod konkursam tyka īsyuteiti 15 dorbi, bet augstuokū žurejis viertiejumu sajēme latgalīšu literaturā jau zynomuo dzejneica, literaturkritike i žurnaliste Ligija Purinaša ar tūpūšuo romana “Sieviete” fragmentu. Ūtrū vītu sajēme Laura Strode ar dorbu “Lubuona valns”, bet trešū – Annele Slišāne ar “Kuo tev īt?”. Taipat žurejis atzineibys tyka pīškiertys ari Valijai Platacei, Ivo Gilučam i Lilijai Limanei. Itūgod konkursa devize beja “Kai tev dzelys?”. Pasuokuma laikā beja vareiba latgaliski  dzierdēt na tik pīcu konkursa finalistu prozys dorbu skaitejumus pošu autoru izpiļdejumā, bet ari latgalīšu dzeju, kuru muzykali izpiļdeja i skateituojim duovuoja muziki Dana Vasiļjeva i Mārcis Lipskis. Literari muzykalū vokoru vadeja Latgolys viestnīceibys “Gors” pasuokumu producente, Latgalīšu kulturys goda bolvys “Boņuks” koordinatore Daira Lāce.

Konkursa pyrmuos vītys sajiemieja Ligija Purinaša latgalīšu literaturā ir jau zynoma autore, vystik, kai poša pīzeist, pīredzis raksteit taišni prozu pyrma tuo jai nav bejs: “Maņ dorba īsnīgšona beja eksperimentala, i es nazynuoju, kas nu tuo saīs i kaids vyspuor byus rezultats. Patīseibā es naasmu prozā vyspuor. Es naasmu rakstejuse prozu, i itys vīnkuorši beja muns pyrmais mieginuojums īsnēgt, redzēt, kas nūtiks. Deļtuo par rezultatu asmu šokā, es nagaideju.” Iz vaicuojumu, voi jei jiutās gondareita i lapna par tū, ka roksta latgaliski, kluotyn vēļ par dorbim sajamūt ari atzineibu, Ligija atbiļd apstyprynūši, izceļūt tū, ka “mes naasam nikas pretiejs latvīšu volūdai, mes asam daļa nu tuos, vīnkuorši vajag lapnuotīs ar sevi, deļtuo ka tys, kū mes dorom, ir cīši, cīši svareigi”.

Konkursā “Latgolys prozys skaitejumi 2025” tyka aicynuots pīsadaleit sevkurs grybātuojs, naatkareigi nu vacuma voi īprīškejuos pīredzis rakstnīceibā – beja  gaideiti vysu Latgolys kulturtelpai pīdareigūs autoru prozys dorbi – kai jau pīredziejušu, tai ari debitantu. Par konkursam īsyuteitūs dorbu nūviertiešonu beja atbiļdeiga žureja – tulkuotuoja Māra Poļakova, pārnejuo gods uzvarātuoja, žurnaliste i gruomotu blogere Inga Kaļva-Minina, redaktore i žurnaliste Maruta Latkovska, literaturzynuotneica i literate Ilze Sperga i tulkuotuojs i gruomotu izdeviejs Snorre Karkonens-Svensons. Žurejis lūcekle Inga Kaļva-Minina par konkursa pyrmuos vītys dorbu romana “Sieviete” fragmentu komentej: “Maņ patyka dorba jaunekleiguo volūda i radeituo intriga – losūt maņ gribiejuos izzynuot turpynuojumu. Mes ari dzierdiejom kluotīnē, ka Ligija tai cīši labi pīrakstejuse nūslāgumu, ka tev vīnkuorši gribīs zynuot, kas niu byus tuoļuok golvonajai varūnei.”

Konkursu “Latgolys prozys skaitejumi 2025” organizēja latgalīšu kulturys kusteiba “Volūda”, tū atbolsta literaturys festivals “Prozas lasījumi 2025” (Latvejis Rakstnīku savīneiba), Vaļsts kulturkapitala fonds, latgalīšu kulturys ziņu portals lakuga.lv, žurnals “Domuzīme”, izdevnīceiba “Zvaigzne ABC” i Rēzeknis nūvoda Lūznovys muiža.

Galerejā biļdis nu konkursa “Latgolys prozys skaitejumi 2025” nūslāguma pasuokuma. Foto: Amanda Anusāne