Rokstu sagataveja: portals lakuga.lv

6. decembrī metalmuzykys grupa “Varang Nord” Daugovpiļs Kulturys centrā “Vārpa” prezentēja sovu jaunū albumu “Mygla”. Kai viestej grupys puorstuovi, jaunais albums ir smoguoks, tehniskuoks i melodiskuoks par īprīškejim. Tymā saplyust poguonu folks, death metal i melodiskuo metala elementi.

“Mygla” ir grupys “Varang Nord” sastais albums, pa vydu albumim 2023. godā grupa izdeve ari paplašynuotuo atskaņuojuma (extended play) singlu “Veļi”. Albuma muzykys autori ir grupys dalinīki Maksims Popovs i Jelena Kalniša. Sovpus dzīsmei “Moldu dīvs” muzykys izveidē pīsadalejs ari Artjoms Kuricins, vuordus pīrakstejs Artjoms Kuricins i Kaspars Galejs. Albuma bungu daļu ir pīrakstejs i izpiļdejs Dmitrijs Suhanovskis, basu – Sergejs Karševs, orkestra aranžiejumus – Yuri Borin, gostu vokalus izpiļdejuši Alex Under, Jānis Drēgeris i Lesley Knife. Albuma īrokstu i izdūšonu paveikuse grupa sadarbeibā ar Gintu Lundbergu.

Albumā “Mygla” ir 10 dzīsmis, nu tūs devenis piļneibā voi dalieji ir latgaliski.

Grupa “Varang Nord” ir 2014. godā veiduota Latgolys poguonu folk/death metala grupa nu Daugovpiļs. “Varang Nord” apvīnoj skorbūs death metala rifus ar episkom akordeona dzīsmem, rodūt unikalu zīmeļu poguonu/folk metala sajaukumu. Itūšaļt grupā ir pīci dalinīki: Maksims Popovs, Jelena Kaļniša, Valērijs Solovjovs, Vjačeslavs Janens, Nikita Kobcevs.