Rokstu sagataveja: portals lakuga.lv

Itamā sastdīnē, 13. decembrī, Aulejis Tautys nomā etnografiskais ansamblis “Aulejis sīvys” svieteis 85 godu jubileju ar koncertu “Ar dzīsmeiti saulī guoju”.

Etnografiskais ansamblis “Aulejis sīvys” ir vīns nu senejuokūs etnografiskūs ansambļu Latgolā. Ansambli vadejušys Domicella Dzalbe, Genovefa Konošonoka i niu Sandra Vaišle. Sandra ir dzymuse Guļbinē, bet Aulejā īsapreciejuse i palykuse. Jei stuosta, ka cīši lapnojās i bejuse prīceiga, kod pyrmū reizi dzīduojuse ar ansambli, vuicejusēs ari izlūksni, deļtuo ka tei kotrā vītā asūt cytaižuoka.

Sandra Vaišle pastreipoj, ka ansamblis rauga saglobuot īprīškejūs paaudžu tradicejis i dzīšmu skaniejumu, koč ari ansambļa sastuovs ir cīši puorsamejs. “Kuri grib dzīduot, tī dzīd, kuri naizprūt ansambli, tī padzīd i dreiži aizīt. Varbyut bolsi mums nav vaira taidi poši, bet dzīšmu skaniejums ir taids pats. Mes gribim tū saglobuot. Es uzskotu, ka dzīsme, kurū mes saglobojam, ir tūs senejūs laiku dzīsme – ka reiz Aulejis sīvys, to Aulejis sīvys, ka bez instrumentu, to bez instrumentu. Kai seņuok – sprostai!”

Vaicuota, ar kaidom sajiutom jei sagaida sastdīnis koncertu, Sandra atbiļd: “Sajiutys ir cīši emocionalys. Taids interesants godskaitlis. Gribim pīminēt bazneicā ar misi ari aizguojušuos dzīduotuojis, kurys jau pavadeitys smiļšu kalneņā. Ari dzīsmis itymā klusajā laikā byus taidys par dzeivi, par puordūmom.”

Sandra Vaišle stuosta, ka jubilejis vokora gaitā byus ari vairuoki puorsteigumi – pyrmū reizi tiks paruodeits jaunais “Aulejis sīvu” karūgs ar uzrokstu latgalīšu volūdā, kurū izauduse Olga Jokste. Eipaši sirsneigi jei izceļ ari tū, ka koncertā ar “Aulejis sīvom” kūpā byus ari etnografiskuo ansambļa bejušuo daleibneica Annele Vanaga, kura dzymuse 1934. godā. Ansamblī jei suokuse dzīduot 1960. godā.

Koncertā pīsadaleis ari ansambļa draugi – Dagdys folklorys kūpa “Olūteņi”, Izvolta folklorys kūpa “Izvoltīši”, Ūdreišu folklorys kūpa “Rudzutaka” i ari Viļānu kapela “Bumburneicys”.