Rokstu sagataveja: portals lakuga.lv

Latgolā turpynojās izgleiteibys sistemys reformys, kas skar na tik školānus i jūs vacuokus, tok ari pedagogus i vītejuos kūpīnys. Raidejumu cykla “Latgolys susātivs – turpynuojums” 5. raidejumā, kas itūsezon ir ari nūslādzūšais, tuo veiduotuoji apmeklēs Rēzeknis nūvoda Dekšuoru pogostu i Ludzys nūvoda Cyblys pogostu, kur vītejuos izgleiteibys īstuodis ir byutyskai puormejušys darbeibu pādejūs godu laikā. Raidejumu varēs vērtīs jau itū sastdiņ, 13. decembrī, kanalā TV24 17 stuņdēs, ar atkuortuojumu svātdiņ, 14. decembrī, 10.30 stuņdēs. Taipoš ari pyrmūdiņ, 15. decembrī, kanala ReTV vierszemis apraidē, Latgolys regionalajā televizejā 17.30 stuņdēs.

Raidejums gasteis Ludzys nūvoda Cyblys pogostā, kur seņuok atsaroda Cyblys vydsškola, tok 2024. godā lamts likvidēt vydsškolys pūsmu i itūšaļt tei ir Cyblys pamatškola. Izgleiteibys īstuodis direktore Aija Jonikāne kūpā ar pedagogim i školānim īpazeistynuos ar školys styprajom pusem i pādejuo laika puormejom. Sovpus Ludzys nūvoda Izgleiteibys puorvaļdis vadeituoja Gunta Stolere pastuosteis par ituos šaļts situaceju nūvodā i kai aktualuos nūtikšonys ītekmej ari Izgleiteibys puorvaļdis dorbu.

Taipoš tiks gasteits Rēzeknis nūvoda Dekšuoru pogostā, kur nazkod aktivai dorbuojuos Dekšuoru pamatškola, tok 2023. godā tei pīvīnuota Viļānu vydsškolai kai atseviška strukturvīneiba i piec laika puotrauce darbeibu pavysam. Koč i školys Dekšuorēs vaira nav, tuos telpys nastuov tukšys – tī itūšaļt aktivi dorbojās uzjiemiejs Viktors Marjuničs, organizejūt vosorys nūmetnis školānim. Kab pabaruotu nūmetņu dalinīkus, sūpluok školai atkluota ari kopejneica-iednieca “Ienāc” Vinetys Knipys vadeibā, kura izjiut lelu vītejūs i apleicejūs cylvāku pīprasejumu.

Raidejuma veiduotuoji pīsadaleis ari Izgleiteibys i zynuotnis ministrejis i cytu izgleiteibys instituceju organizātā regionalā seminarā izgleiteibys īstuožu direktorim Leivuonā, kur kai ar organizatorim, tai ar dalinīkim puorsprīss patīsū situaceju školuos i izaicynuojumus, kab izgleiteibys sistema palyktu efektivuoka i īkļaunūšuoka.

Projekta “Latgolys susātivs – turpynuojums” mierkis ir sataiseit pīcu televizejis raidejumu cyklu, kas byutu turpynuojums jau īprīšk veiduotajam raidejumu cyklam latgalīšu volūdā “Latgolys susātivs” par aktualim problemvaicuojumim Latgolā. Raidejumūs teik aktualizātys i analizātys sabīdryskai svareigys temys, kai bezdorbs i tuo cālūni, inflaceja regionā, izaicynuojumi medicinys nūzarē, turysma atteisteiba i izgleiteibys reformys sakys. Nūsaukumā latgaliskais vuords “susātivs” latvyski nūzeimoj “ēna”, i tys simboliski paruoda raidejuma golvonū ideju – īsavērt realuos vidis “susātiva pusē”, kab maklātu problemu cālūņus i skaidruojumu. #SIF_MAF2025

Raidejumus piec tūs puorraidis varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus LRT socialūs medeju vītnēs, kai ari e-postā lrt.zinas@inbox.lv voi zvonūt/rokstūt iz t. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Latgolys susātivs – turpynuojums” saturu atbiļd SIA “Latgales reģionālā televīzija”. #SIF_MAF2025

Publikaceju apmoksoj Latgolys regionaluo televizeja