Rokstu sagataveja: portals lakuga.lv

Īsacejumus trešajai adventa nedeļai sagatavejs Rēzeknis Dīva Žāļsirdeibys Romys katuoļu bazneicys prīsters Stanislavs Prikulis. Interveju ar Stanislavu var puorskaiteit ITE. Jis aicynoj sagataveit sovu sirdi pesteituoja atīšonai ar Muotis Terezis vuordim, spovedi i svecis īdegšonu Adventa vaiņukā.

Muotis Terezis vuordi puordūmom

Itymā Adventa laikā varim atrast šaļteņu, lai puordūmuotu vuordus, kuri beja cīši meili Muotei Terezei nu Kalkutys. Tī beja pīraksteiti iz klūstera sīnys, kur jei kūpā ar sovom Muosom i breivpruoteigajim dorbuojuos i paleidzēja cīši lelam skaitam cylvāku. Goreiguos puordūmys var mums dūt vareibu dziļuok izdzeivot itū laiku i naaizmierst, ka gols golā tys ir storp Tevi i Dīvu.

Dori tū tai voi tai.
Cylvāki bīži ir nalogiski, naracionali i pošcentrāti. Pīdūd jim tai voi tai.
Ka tu esi laipnys, cylvāki tevi bīži var apsyudzēt slāptūs nūlyukūs. Esi laipnys tai voi tai.
Ka tu esi veiksmeigs, tev var rastīs daudz vyltus draugu i eistu īnaidnīku. Esi veiksmeigs tai voi tai.
Ka tu esi gūdeigs i patīss, cylvāki var tevi maldynot i izmontuot. Esi gūdeigs i patīss tai voi tai.
Tū, kū tu esi radejs daudzus godus, kaids var sagraut vīnā dīnā. Rodi tai voi tai.
Ka tu esi mīreigs i laimeigs, cyti var byut skaudeigi. Esi laimeigs tai voi tai.
Lobais, kū tu dori šudiņ, bīži tiks aizmiersts reit. Dori lobu tai voi tai.
Dūd pasauļam vyslobokū, kas tev ir, i tys, īspiejams, nikod nabyus pīteikami. Dūd pasauļam lobū tai voi tai.
Gols golā tys ir storp tevi i Dīvu. Tys nikod nav bejs storp tevi i jim tai voi tai.

Originalū tekstu angļu volūdā var atrast ar nūsaukumu “Mother Teresa Anyway poem”.

Adventa spoveds

Asam latgalīši i ticeiba ir myusu identitatis daļa, partū ir tik labi, ka, gaidūt Jezus Kristus atīšonu, varim sagataveit sovys sirds, ejūt pi spoveds, partū ka Pesteituojs īt i klauvej ari pi myusu sirds durovu, kai jis kaidreiz klauvēja pi Betlemis cīma dzeivuotuoju. Lobs veids, kai sasagataveit grāksyudzei, ir atrast vareibu aizīt iz tyvuokū dīvnomu i pīsadaleit Sv. Mišā kaidā dorba dīnā. Tod ir mozuok tautys i mīreiguoka nūskaņa. Sakuortuosim svātkim na tik sovys sātys, bet ari sovys sirds! Informaceju par miša laikim Rēzeknis Dīva Žāļsirdeibys Romys katuoļu bazneicā atrassi ITE.

Svecis īdegšona Adventa vaiņukā

21. decembrī mes vysi tiksim meili gaideiti myusu breineigajūs dīvnomūs, lai īdagtu 4. Adventa vaiņuka sveci. Tei ir šmuka, goreiga šaļts i atskaitis punkts myusu ticeibys ceļā. Vaim uzklauseit tū, kū Dīvs mums soka Svātajūs Rokstūs, pījimt Svātū Komuneju, kai ari lyugtīs kūpā ar myusu bruolim i muosom par mīru pasaulī. Kotra lyugšona – ari Tova – ir svareiga i pavairoj mīru i Dīva kluotbyutni ap mums! Byusim tī, kas sagaida myusu Pesteituoju ar atvārtom sirdim!