Rokstu sagataveja: portals lakuga.lv

Zīmyssvātku i Jaunuo gods sagaideišonys laiks vysod ir eipaši boguots ar vysaiduokom nūtikšonom. Tūs vydā itūgod natryukst ari latgalisku pasuokumu. Portals lakuga.lv pīduovoj idejis, kai pavadeit garuos svātku breivdīnys latgaliskā atmosferā, tok ar vēļ plotuoku pasuokumu pīduovuojumu var īpasazeit myusu nūtikšonu kalendara sadaļā.

Zīmys saulis grīži Ondrupinē

Janvarī muzejs “Ondrupinis lauku sāta” varēs svieteit “Mozuos tradiceju školys mozajim” diveju godu jubileju. Kotru mienesi tamā sasateik saimis ar bārnim, kab izzynuotu vaira par latvīšu tradicejom. 21. decembrī 14 stuņdēs gaidoma ituo gods nūslādzūšūo “Mozuos tradiceju školys mozajim saīšona” – tiks vylkts blučs, īts čyguonūs, byus dzīsmis, rūtalis i daņči.

Muzykals pīdzeivuojums ar vokalū studeju “Skonai”

Rēzeknis nūvoda vokalajai studejai “Skonai” decembra beigys ir koncertim boguotys. 21. decembrī 16 stuņdēs tuos dalinīki izdzīduos adventa kalendara muzyku “Ziemas ceļa stāsti” Lūznovys muižā, 24. decembrī 18.30 stuņdēs izskanēs kasgadejais studejis Zīmyssvātku koncerts Bieržgaļa Svātuos Annys Romys katuoļu bazneicā, sovutīs 25. decembrī “Skonai” uzastuošona byus daļa nu Zīmyssvātku pasuokuma Ludzys kulturys nomā.

Gorda meistarklase Daugovpilī

22. decembrī 17.20 stuņdēs Daugovpiļs Vīneibys nomā smuorduos piec rauga meiklis – tī nūtiks saimineicys Annys Lazdānis meistarklase, kurā jei cytim īvuiceis sovu rauga meiklis recepti, kai ari pastuosteis, kai tū izmontoj Latgolys tradicionalajūs iedīņūs.

“Bezgaleiga sirds” Rēzeknis nūvodā

Divejus svātku koncertus Rēzeknis nūvodā pīduovuos muzykaluo apvīneiba “Bezgaleiga sirds” aba Džeina Gavare, Lolita Svilāne i Juris Laizāns. 25. decembrī 14 stuņdēs jūs varēs satikt Rykovys kulturys nomā, bet 27. decembrī 19 stuņdēs – Ūzulmuižys kulturys nomā.

Sadoncuošona ar čyguonim Iļžukolnā

27. decembrī 14 stuņdēs Iļžukolna tautys nomā varēs sadoncuot ar Zīmyssvātku čyguonim – sagaideit čyguonu guojīni, kūpeigai sasadzīduot, pīsadaleit rūtaļuos, īpasazeit ar čyguonu maskom, kai ari beiguos jūs dzeit paceli. Pasuokumā uzastuos Ambeļu tradicionaluos muzykys grupa “Speiga”.

Jampadracs Baļtinovā i karnevals Upītē

Folklorys kūpys “Upīte” fani divejis dīnys piec kuortys var īplānuot pavadeit Zīmeļlatgolā. 27. decembrī 19 stuņdēs Baļtinovys kulturys nomā gaidoms “Zīmyssvātku jampadracs”, kura pīsadaleis na tik vītejī amaterkolektivi, tok ari gosti nu Upītis. Sovutīs 28. decembrī 21 stuņdē pošā Upītē byus tradicionalais karnevals – tuo gosti itūreiz byus “Latgales klezmeri”.

Dekterīši Saļņovā i baļtinavīši Kuorsovā

Svātku laikā sev prīcu varēs atrast ari teatra cīneituoji. 28. decembrī gondreiž reizē Ludzys nūvodā uzastuos diveji, īspiejams, aktivuokī Latgolys amaterteatri. 17 stuņdēs Saļņovys kulturys nomā varēs nūsavērt Dekteru amaterteatra jaunuokū izruodi “Vyss, kas nūteik, nūteik iz lobu!”, sovutīs 18 stuņdēs Kuorsovys kulturys nomā byus jau par klasiku palykušuo Baļtinovys amaterteatra “Palādas” izruode “Ontans i Zīmassvātki”.