Rokstu sagataveja: portals lakuga.lv

Itūgod bīdreiba “Latgolys Turysma asociaceja” jau dasmytū reizi piec kuortys organizēja Latgolys Turysma goda bolvu padūšonu. Goda bolvys mierkis ir veicynuot Latgolys turysma pīduovuojuma kvalitatis uzalobuošonu, taipoš ari izceļt i apbolvuot Latgolys regiona lobuokūs turysma nūzaris puorstuovus. Bīdreiba viestej, ka itūgod bolva tyka padūta deveņuos dažaiduos nominacejuos.

Bīdreibys puorstuovus prīcynoj, ka sevkurā godā bolvys dasacejumu skaits ir gona lels, itūgod tī beja 54 pretendenti nu vysa regiona. Goda bolvai ir devenis nominacejis, byutyskai, ka divejuos nu tūs teik atseviški izdaleits privatais i publiskais sektors, tai narodūt navīnleidzeigu konkurenci. Bolva tyka padūta Rēzeknē, Latgolys viestnīceibā “Gors”, 12. decembrī.

Īrosts, ka bolvys dizainu kasgadeji veidoj cyts meistars, par pamatu jamūt muolu i kūku, taipoš dalīkūt Latgolys Turysma asociacejis 2019. godā izveiduotuo zeimyna logo. Itūgod bolvu autors beja Stanislavs Viļums nu pūdnīku darbneicys “Cukrasāta”.

Pretendentu dasacejumus izviertēja kompetenta žureja, kurys sastuovā itūgod beja LIAA projektu vadeituoja Kristīne Mickāne, ziņu portala “Baltic Travelnews” direktors Aivars Mackevičs, žurnala “A12” redaktore Ināra Groce, latgalīšu kulturys ziņu portala lakuga.lv redaktore Laura Melne i pārnejuo gods bolvu sajiemieji – lobsajiutys kompleksa “Avotiņš” saiminīki.

Latgolys Turysma goda bolvys 2025 sajēme:

1. Turysma profesionaļs – Rotko muzeja vadeituojs Māris Čačka;
2. Lobuokuo turystu mītne piļsātā – “Old believers apartment” Rēzeknē;
3. Lobuokuo turystu mītne laukūs – gostu sāta “Zaļā sala” Rēzeknis nūvodā;
4. Lobuokais jaunais privatais turysma objekts – “Rūķu sāta Hribti” Ludzys nūvodā;
5. Lobuokais jaunais pošvaļdeibys turysma objekts – Kuorsovys kulturviesturis centrys “Līču mājas” Ludzys nūvodā;
6. Lobuokais privatais turysma objekts – privatuo ekspoziceja “Abrenes istabas” Bolvu nūvodā;
7. Lobuokais pošvaļdeibys turysma objekts – “Ondrupinis lauku sāta” Kruoslovys nūvodā;
8. Goda muojražuotuojs – ZS “Kurmīši” Kruoslovys nūvodā;
9. Turysma izcileiba 2025 – Rēzeknis Zaļuos sinagogys gids i vysys Latgolys kulturys i turysma profesionaļs Voldemārs Ivdris.

Turysma goda bolvys pretendentu dasaceišona ir veids, kai izceļt tuos turysma vītys i puorstuovus, kuri sovā pakolpuojumā voi produktā īvīsuši inovacejis, byutyskai papyldynuojuši asūšū pīduovuojumu voi vīnkuorši atstuojuši vyspalīkūšuokū pozitivū īspaidu. Dasaceit pretendentus Latgolys Turysma bolvai kasgadeji var sevkurs interesents. Goda bolvys teik padūtys piec kasgadejuos Latgolys Turysma konferencis.

Foto galerejā: atsavieršona iz Latgolys Turysma konferenci i Goda bolvu padūšona. Foto: Natālija Brokāne.