Rokstu sagataveja: portals lakuga.lv

Bolvu nūvoda zemnīku saimisteibā “Kotiņi” (Kuotini) saimnīkoj Aldis Ločmelis i Vija Kuļša. Tei ir vīna nu leluokūs saimisteibu Latgolā, kura audzej vysaiduoka veida gryudaugus, lobā ražys godā saražojūt pat 10000 tonnu sertificātys sāklys. Teik audzātys daudzveideigys kulturys – gryudaugi, proteinaugi, ari zuoluoju sāklys. Paraleli saimisteibai izveiduota ari ādynuošonys vīta “Rekovas dziernovas”, kur gostim ir vareiba nūgaršuot vysaiduokus iedīņus, kurūs pamatā ir taišni “Kuotiņūs” ražuotuo produkceja. Itūreiz saimineica Vija doluos ar suolejūs kūču recepti.

Zemnīku saimisteibys “Kotiņi” i ādynuošonys vītys “Rekovas dziernovas” saimineica Vija stuosta, ka suolejūs kūču recepte īt nu juos veira – saiminīka Alda mamys. “Itys ir suolejais, na soldonais kūču variants, kas ļaudim labi garšoj. Kas agruok saimisteibā beja daīmams – pamatā gryudi i pupys, nu tuo ari itei recepte,” stuosta Vija. Recepte ir drupeit papyldynuota i uzlobuota myusu dīnom.

Recepte
Byus vajadzeigs: katleņš, iudiņs, cyukys gaļa, casnāgi, lauru lopys, malnūs pypuru gryudi, selerejis, burkuoni, kvīšu gryudi (ar vysu apvalku), cyuku pupys (sastuovdaļu daudzums piec sajiutu i āduoju skaita).

Gataveišonys process: pyrma gataveišonys īmārc iudinī cyuku pupys. Gaļu ar kaulim puorlej ar soltu iudini, aizvuorej i nūputoj. Dalīk lauru lopys, casnāgus, malnūs pypuru gryudus, selerejis, burkuonus i vuorej iz lānys guņs 30 minotu. Tod jam kvīšu gryudus ar vysu apvalku, nūskoloj i pīber buļjonam, vuorej 1,5 stuņdis. Aptyvai 40 minotu pyrma pabeigšonys pīber puora sauvu izmārcātu cyuku pupu. Pasnādz ar kriejumu i zaļumim.