Rokstu sagataveja: portals lakuga.lv

Goda izskaņā portals atsaver iz decembrī izdūtajim jaunumim latgaliskajā muzykā – kur klauseituoji var atrast seņ īmeiļuotys dzīsmis voi ari nūsaklauseit koč kū pavysam nadzierdātu.  

Dabasu Durovys “Daaistikšonys”

Pyrma Zīmyssvātku sovu jaunuokū dzīsmi “Daaistikšonys” publicējuse grupa “Dabasu Durovys”. Dzīsmis vuordu i muzykys autors ir Arņs Slobožanins, īrokstā pīsadalejs ari Romans Sladzis (klasiskuo gitara). Par dzīsmis stuostu Arņs soka: “Daaistikšonys ir pīskuorīni. Koč ari navarim dzeivuot tymsā, vysi asam cylvāki i myusūs skrīn elektreiba, nareši ceļš iz sirdi ir slāgts.” 

Sintija Velme “TikTok”

Dzīduotuoja nu Bolvu nūvoda Sintija Velme izlaiduse jaunu dzīsmi “TikTok”, kas, kai poša roksta dzīsmis aprokstā, rodusēs, pasasokūt vysim streidim socialuos platformys “TikTok” komentarūs, kai ari nasenejai uzvarai konkursā “Primero Faktors”. Konkursā Sintija dabuojuse vaira par ostoņom tyukstūšom bolsu i tykuse pie naudys laimasta. Tymā ari atzineigi nūvārtāts, ka sovā profilā jei kai konkursa dasacejumā, tai ari kasdīnys video lītoj latgalīšu volūdu. Dzīsmis “TikTok” vuordu autore ir Sintija Velme i Aina Korkla, melodejis autore ir poša Sintija, aranžeju taisejs Kaspars Maks. 

Juuk “Ak, nōc, Emanuel”

Decembra suokumā grupa “Juuk” izdavuse catūrtū studejis albumu “Tulkojumi”, kurā jaunā skaniejumā atrūnama ari dzīsme latgaliski “Ak, nōc, Emanuel”. Dzīsmi grupa “Juuk” sadarbeibā ar Hariju Ločmeli nu grupys “Aston Kais” beja izlaiduse 2022. godā, veļtejūt tū mīram iz zemis i aicynojūt zīduot leidzekļus Ukrainys atbolstam. Grupys “Juuk” sastuovā ir Oskars Jansons (bolss, gitarys, bandžo), Edgars Šubrovskis (bolss, basgitara, gitarys), Sniedze Prauliņa (flauta, bolss), Rasa Puole (Pole) (vejūle, bolss), Ričards Dauksts (gitarys, bolss) i Niks Moss Rodžerss (bungys, perkusejis, bolss). 

Baritoni “Sauc mani vēļ”

Grupa nu Rēzeknis “Baritoni” decembrī aktivi koncertēja ar sovu Zīmyssvātku programu “Priecīgākie Ziemassvētki” i ar taidu pat nūsaukumu izdavuse albumu. Tymā skaņ desmit dzīsmis, tūs vydā ari dzīsme latgaliski “Sauc mani vēļ”, kura pyrmū reizi pi klauseituoju tyka jau 2020. godā. Tuos vuordu i muzykys autors ir grupys daleibnīks Mārtiņš Strods.