Rokstu sagataveja: portals lakuga.lv

Kab styprynuot pīdareibu sovai vītai i īsaisteit vītejūs dzeivuotuojus, vairuokuos vītuos Latgolā kasgadeji teik radeiti kalendari godam iz prīšku. Atseviškūs pogostūs tūp kalendari deļ vītejūs dzeivuotuoju, sovpus muzejā “Ondrupinis lauku sāta” radeits kalendars “Mozais latgalīša Saulis gods” deļ plotuokys auditorejis. Taipoš ari bīdreiba “Latgolys etnografiskuo viestnīceiba” sagatavejuse sovu kalendaru aba dīnruodi.

Aulejis pogostā kalendars tūp jau 11 godus

Kruoslovys nūvoda Aulejis Tautys noma kulturys pasuokumu organizatore Ilze Vovka stuosta, ka ideja radeit sovu kalendaru rodusēs nazkodejai bibliotekys vadeituojai Zinaidai Pikmanei, kura nu suoku poša braukuse i fotografiejuse Aulejis pogosta vītys. Drupeit vieļuok ideja atsateistejuse i niu kasgadeji teik uzrunuoti vītejī dzeivuotuoji, kab tī īsyuteitu sovys fotografejis. Kotru godu ir ari sova tema, par pīmāru, 2025. gods tema beja “Dzeivuo radeiba”, sovpus 2026. gods tema ir “Vīna dīna pogosta dzeivē”. Aulejis kalendars teik izdūts apmāram 200 eksemplarūs, kab pa vīnam kalendaram byutu kotrai sātys saimisteibai i ari tim, kas nu molys īsyutejuši kaidys pogosta fotografejis. Niu ryupi par Aulejis kalendaru tur pogosta bibliotekys vadeituoja Inta Vecele. Kalendars nav paradzāts puordūšonai.

Izvolta pogostā kalendars divejūs veidūs

Kruoslovys nūvoda Izvolta Tautys noma kulturys pasuokumu organizatore Silvija Stivriņa tautys nomā struodoj jau pīcus godus, vys jei miņ, ka kalendara tradiceja varātu pastuovēt jau godus septeņus. Taipoš kai Aulejā, ari Izvoltā vītejī dzeivuotuoji īsyuta sovys pogosta fotografejis, kurys teik salyktys kolažā i sataiseiti diveji kalendara varianti ar dažaidom fotografejom, kotrā kolažā ir ap 25 fotografeju. Kagadeji kalendarus 18. novembra svātkūs padūd čakluokajim pogosta dzeivuotuojim, kas goda laikā vysuvaira darejuši deļ sovys vītys.

Kalendars ar foto nu pyrmuos Latgolys tautystārpu skatis

Bīdreiba “Latgolys etnografiskuo viestnīceiba” sagatavejuse kalendaru sadarbeibā ar Daugovpiļs vaļstspiļsātys pošvaļdeibys īstuodi “Vīneibys noms”. Kalendarā izmontuotys fotografejis nu pyrmuos Latgolys tautystārpu skatis, kas nūtyka ituo gods 31. majā Daugovpiļs Dizaina i muokslys vydsškolā “Saules skola”. Fotografeju autore ir Svetlana Pokule.

Bīdreibys puorstuove Iveta Seimanova roksta: “Jaunais dīnruods ir kai loba “piecgarša” pyrmajai latgalīšu tautystārpu skatei. Skaitu, ka tautystārpu var nest tik kūpā ar volūdu, kurā muna tauta jau godu symtim ir runuojuse. Kūpā ar breineigajom Svetlanys Pokulis fotografejom vasala goda garumā kalendarā vuordi, kas izskanēja Daugovys upis molā, Saulis školā, iztak kai upe.” Iveta ari pastreipoj, ka kalendars ir pīpiļdeits ar vacvuordim i tradicionalū latgaliskū dzeivisziņu. Ka ir gribiešona tikt pi sova kalendara eksemplara, var vaicuot Ivetai Seimanovai.

Ondrupinis “Mozais latgalīša Saulis gods”

Muzejs “Ondrupinis lauku sāta”, nūslādzūt ūtrū “Mozuos tradiceju školys” godu, izdevs praktisku kalendaru 2026. godam ar apkūpuojumu, kas kotrā godskuortā nūteik dobā, tradicionalā lauku sātā i kaidys tradicionalys izdareibys byutu veicamys, kab nūsvieteit svātkus.

Kai stuosta “Mozuo latgalīša Saulis goda” kalendara iniciatore Evija Maļkeviča-Grundele, reikuotūs pasuokumu laikā saguoja izpieteit, apkūpuot i praktiski paraudzeit vysaiduokys Latgolā i ari cytūs Latvejis nūvodūs pīkūptys tradicejis i izdareibys, kū seņuok darejuši myusu seņči, svietejūt Saulis kalendara cykla svātkus i saulis astronomiskūs pagrīzīņa punktus. Kalendars “Mozais latgalīša Saulis gods” ir aicynuojums svieteit svātkus kūpā, saskaņā ar dobys procesim i sasateikūt kūpeiguos nūtikšnuos Ondrupinis muzejā, taipoš ari īnasūt jaunys tradicejis sovā saimē i draugu lūkā.

“Dzīžūt i skandynojūt tematiskuos tautysdzīsmis attīceigajā goda laikā, kai ari izspieļojūt godskuortu rūtalis, mes atbolsojam dobu i puļsejam saskaņā ar tū! 2026. gods kalendars ir nalels atspierīņa punkts i mozs īskots tradiceju daudzveideibā, kuru ceram ari iz prīšku pylnveiduot i papyldynuot,” doluos Evija Maļkeviča-Grundele.

Kalendars ir kompakts A3 plakats, kū var dalikt da sīnai. Pi tuo var tikt, sasazynojūt ar muzeju “Ondrupinis lauku sāta” pa telefonu 26458876 voi 26187266.