Rokstu sagataveja: portals lakuga.lv

Bīdreiba “LOBS” jau vaira nakai 10 godu garumā eistynoj vysaidys aktivitatis Latgolys laukūs dzeivojūšim jaunīšim i bārnim. Tūs mierkis ir dažaiduot i uzlobuot jūs breivuo laika pavadeišonys veidus, kai ari izmontuot sovu potencialu. Itūreiz kūpā ar Rēzeknis nūvoda jaunīšim izzynuots Strūžānu pūrs i sataiseits izgleitojūšs buklets par tū.

Rēzeknis nūvoda jaunīši nu Strūžānu i Drycānu pogostu nu 2025. gods 1. juņa da 2026. gods 31. janvara eistynuoja Eiropys Solidaritatis korpusa projektu “Daba=Cilvēks”. Bīdreibys “LOBS” puorstuove Ingūna Semule stuosta, ka projekta ilgtermiņa mierkis ir izgleituot dzeivuotuojus par dobys daudzveideibys nūzeimi myusu kasdīnā i nuokūtnē, rūsynojūt izpratni par tū, ka dobai atbylstūša apsaimnīkuošona var nūdrūsynuot ekonomiskū labkluojeibu i izaugsmi, reizē saglobojūt Latvejis florys i faunys daudzveideibu. Iniciativys aktivitatis beja vārstys iz Strūžānu pūra dzeivuotņu daudzveideibys izzynuošonu. Mierka sasnēgšonā tyka eistynuotys vysaidys aktivitatis kai vītejim dzeivuotuojim, tai sevkuram, kurs gribēja atkluot Strūžānu pūra daudzveideibu.

Sadarbeibā ar mokšornīku i medinīku bīdreibu “Piekūns” tyka organizāts nakts puorguojīņs. Tuo mierkis beja izzynuot pūra teritorejā dzeivojūšūs dzeivinīkus i digitalūs reikus, kuri paleidz veikt dzeivinīku uzskaiti dobā. Taipat tyka organizāts puorguojīņs ar putynu entuziastu Rūdolfu Kroiču, kurā tyka sataiseits būrs polarpyucem. Vosorys izskaņā aktivitatem pīsavīnuoja dobys eksperte Renāte Kaupuža, kura vadeja plykspuorņu vāruošonys puorguojīni. Tok, kab aktivuok pīsaisteitu jaunīšus, projekta grupa organizēja orientiešonuos pasuokumu “Stroika fast & Crafty” i “Purva diena” saimem ar bārnim. Itūs pasuokumu mierkis beja pīsaisteit vysaidys dzeivuotuoju grupys i veicynuot interesi par dobu Strūžānu pūrā.

Vīna nu projekta aktivitašu beja sataiseit izzynūšu bukletu “STRŪŽĀNU PURVS. No dabas klusuma līdz dzīvībai”, kurs nūdrūsynuos projekta piecteceibu ari piec tuo beigu. Buklets digitalā veidā daīmams ITE, bet drukuotā formatā – Rēzeknis nūvoda turysma informacejis centrā.

Nūslādzūšais pasuokums nūtiks 27. janvarī, kod jaunīši organizēs pikniku ar zīmys puorguojīni, maršrutā īkļaunūt Strūžānu pūra teritorejis apsavieršonu zīmā.

“Mums kai komandai itys beja eipašs projekts, kam ituos aktivitatis nabeja tikai, lai sasalīdātu, bet mierktīceigi vadeits izgleitojūšs process ar mierki atkluot tū dobys daļu, kas ruodīs pīmiersta i nainteresanta, bet patīseibā globoj sevī plotu dzeiveibys dvašu,” tai projekta vadeituoja Ingūna Semule.

Dorba grupa soka lelu paļdis sevkuram, kurs īsasaisteja aktivitašu nūdrūsynuošonā: Strūžānu kulturys noma vadeituojai Leokādijai Razgalei, breivpruoteigūs jaunīšu komandai, MMB “Piekūns”, Rūdolfam Kroičam, Renātei Kaupužai, Edvardam Putānam i SIA “RA Drukātava”.

Fotogalerejā kartenis nu projekta aktivitašu. Foto: Ingūna Semule

Projektu “Daba=Cilvēks” (Proj. nr. 2025-1-LV02-ESC30-SOL-000347910) finansej Eiropys Savīneiba, itei publikaceja atspīgeļoj vīneigi autora uzskotus i redzīni, na obligati Eiropys Savīneibys, Eiropys Komisejis voi Nacionaluos agenturys (Jaunuotnis storptautyskūs programu agenturys) redzīni. Organizacejis nav atbiļdeigys par publikacejā asūšuos informacejis vysleidza kaidu izmontuošonu. Publikacejis izvītuošonu portalā lakuga.lv apmoksoj bīdreiba “LOBS” nu projekta leidzekļu.