Rokstu sagataveja: portals lakuga.lv

Ituos reizis kulturys īsacejumus pīduovoj muziks i MIKC Latgolys Muzykys i muokslys vydsškolys pedagogs Kristaps Višs, aicynojūt baudeit kvalitativu muzyku tepat, Latgolā. Jis īsaver jau tyvuokūs mienešu kulturys nūtikšonuos.

“Guoyu pa Jazz”

MIKC Latgolys Muzykys i muokslys vydsškolys reikuotais storptautyskais etnodžeza ansambļu konkurss “Guoyu pa Jazz” ir nūzeimeigs kulturys nūtykums, kas reizi divūs godūs puļcej džeza i tradicionaluos muzykys talantus. Nu ituo konkursa ir izaudzs ari muns ansamblis “Bruoli i muosys”, taipoš ari itūgod, 12. februarī, es pats byušu iz “Guoyu pa Jazz” skotivis Latgolys viestnīceibā “Gors”.

Koncertstuosts “Maestro. Raimondam Paulam 90”

Koncertā, kurs 14. februarī nūtiks Latgolys viestnīceibā “Gors”, Latvejis Radejis kors i regionalūs koru dzīduotuoji, Latvejis Radejis bigbends i “Simfonietta Rīga” dirigenta Sigvarda Kļavys vadeibā, pianisti Matīss Žilinskis i Rihards Plešanovs, taipoš ari akters Artūrs Skrastiņš i dzīduotuojs Daumants Kalniņš izzynuos Maestro daudzejuos šķautnis i pīsatyvynuos komponistam caur juo muzyku, partū ka Raimonds Pauls nav tik cylvāks – jis ir vasals laikmats muzykā kai Latvejā, tai uorpus tuos rūbežu.

Latgalīšu kulturys goda bolva “Boņuks”

Kasgadeji latgalīšu kulturys goda bolva “Boņuks” ir na tik atsavieršona iz pārņ padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Tei ir nūtikšona, kurā nūteikti juobyut! Itūgod “Boņuka” bolvu Latgolys viestnīceibā “Gors” padūs 14. martā.

“Latvejis biļdis”

Reigys gitaru kvartetā apsavīnuojuši vairuoki jaunuokuos paaudzis talanteiguokī i aktivuokī klasiskuos gitarspēlis puorstuovi – Kārlis Matīss Zitmanis, Miks Akots i Kaspars Niklasons, ansambļa saspēlei daaicynojūt ari sovu pasnīdzieju – pīredzejušū gitarspēlis virtuozu Kasparu Zemīti. Tai kai es pats turpynoju vuiceit gitarspēli Juoņa Ivanova muzykys vydsškolā, tycu, ka 22. martā Lūznovys muižā eistyn byus fantastiskys koncerts.