Rokstu sagataveja: portals lakuga.lv

29. janvarī myužeibā nūguojs keramiks Juoņs Seiksts (1947–2026), viestej Modūnis nūvodpietnīceibys i muokslys muzejs. Koč i leluokū myuža daļu Seiksts pavadejs Modūnis pusē, sovā dailradē jis turpynuoja kūpt ari dzymtuos Latgolys keramikys tradiceju.

Juoņs Seiksts dzims 1947. gods 26. septembrī myusu dīnu Ludzys nūvoda Mežavydu pogosta Ezernīkūs. Vuicejīs Styglovys pamatškolā i Rēzeknis internatškolā, kur juo muokslinīka talantu pamaneja školuotuojs, vāluok vysā Latvejā labi zynomais Ontons Kūkuojs. Taišni Kūkuojs na tik skubynuojs Seikstu pīsadaleit vysaidūs zeimiešonys konkursūs, tok ari pyrmūreiz nūveds puisi pi Latgolys pūdnīku. Nu ituo braucīņa Juoņs iz sātu atveds zaļu suči, kū globuojs kai svātumu.

1968. godā Juoņs Seiksts absolvēja Rēzeknis Lītiškuos muokslys vydsškolys keramikys nūdaļu. Diplomdorbs “Latgolys vāzis” tyka taiseits Polikarpa Čerņavska vadeibā. Seiksts vuicejīs ari pi Ontona Ušpeļa. Piec školys beigšonys jis divejus godus nūstruoduoja “Latvijas keramikas” Jākubpiļs nūdaļā, tok ryupnīcyska ražuošona piec šablonu Juoni Seikstu naasūt interesiejuse. Piečuok godu jis nūstruoduojs Ciesīs.

Nu 1973. gods Juoņa Seiksta dzeive beja saisteita ar Modūni. Eisu laiku jis struoduojs ari par Modūnis muzeja muokslys nūdalis vadeituoju. Tok taišni Modūnē uzplauka ari Seiksta rodūšuo darbeiba, paraleli tai jis vadeja ari keramikys puļceņus Modūnē, Dzelzovā i Kusā. 1982. godā beja Juoņa Seiksta pyrmuo personalizstuode Modūnis muzejā, piečuok bejušys vēļ vaira nakai 15, treis nu tūs – Vuocejā. Ari itūvosor, ap Juoņa dīnu, Modūnis muzejā ir paradzāta juo personalizstuode.

Leluokū myuža daļu Juoņs Seiksts veiduoja klasiskū Latgolys glazātū keramiku – skryuzis, vāzis, bļūdys, škeivus, svečturus, vysaidus sviļpaunīkus. Jis vysod meklēja jaunys, naparostys formys, kur pasaruodeja juo dziļais, osais dobys vāruojums, rodūšuo breiveiba i ospruoteigais skots. Duorzs bija Seikstu sātys palyka par eipašu ekspoziceju, kur sūpluok kruošnim augim “dzeivuoja” keramikys gaili – Modūnis piļsātys simboli, puču ciļvieceni, suni i pat pingvinu saime. Jis beja pīsavierss ari malnajai keramikai.

2018. godā Juoņs Seiksts sajēme Treju Zvaigžņu ordini. 2019. godā Kulturys ministreja jam pīškeire zeimi “Latviskais mantojums”.

Atsavadeišona nu Juoņa Seiksta byus 5. februarī 14 stuņdēs Modūnis kopu kapleicā.

Portals lakuga.lv izsoka leidzjiuteibu Juoņa Seiksta saimei, kolegim i cytim tyvajim cylvākim.