Rokstu sagataveja: portals lakuga.lv

Valentina dīnā jaunu dzīsmi “Show must go on” i juos videoklipu, kas ir vizuali cīši puordūmuots, prezentēja repere Ūga i apvīneiba “Juos īluos līluos”, deļtuo ituos nedelis kulturys īsacejumus sagataveja vīna nu “Juos īluos līluos” dalineicu, ari dzīduotuoja, kurai napaseņ pošai izguojuse jauna dzīsme “Tagad mierīgi, varbūt pat labi”, i fotografe – Amanda Lapa-Slobožanina.

Romancis, kas plieš sirdi

Itūgod leluokū zīmys daļu asu pavadejuse kūpā ar folklorys kūpu “Upīte”. Kūpā bejom Kostarikā i Egiptē, kur muziciejom i doncuojom festivalūs. Cīši īsadvasmuoju nu jūs aktivuo dzeivis skriejīņa, jūs personeibu i tuo, cik daudzi jī dora i padora. Deļtuo itūnedeļ īsoku nūsaklauseit jūs tikū publicātūs albumus, kas izguojuši tik ar dažu dīnu starpeibu – albumu “Kod īt iz balli” ar 34 dzīsmem i mozū albumu (EP) “Romances” ar breineigom romancem, kas plieš sirdi.

Pasauļa slovonī baleta doncuotuoji Latgolā

Vysod asu sepiniejuse par tikšonu iz operys, baleta izruodem, bet nikod tys nav vēļ saguojs. Reizi gondreiž saguoja tikt Venecejā, bet nūkaviejom. I ite – pasauļa slovoni baleta doncuotuoji 22. februarī ar sovu izruodi “Drakula” brauc da myusu iz Latgolu, iz Latgolys viestnīceibu “Gors”. Itū navar laist garum! Beletus var vēļ sagiut ITE.

Vajag baudeit zīmu!

Lyudzu, lyudzu, cikom ir vareiba, vajag izbaudeit zīmu pylnā apmārā! Braucam iz Sarkaņkolnu voi Egļu kolnu baudeit vysys zīmys prīškrūceibys! Taišni snovborduošona maņ ir lela aizaraušona zīmā, taipat kai tys ir ar sērfuošonu vosorā. Tik žāļ, ka laika ir tik, cik juo ir. Deļtuo vajag giut kotru breivū šaļteņu i bez līkys dūmuošonys laist iz kolnu!