Rokstu sagataveja: portals lakuga.lv

Tikū aizvadeits gaideituokais pasuokums latgalīšu kulturā – bolvys “Boņuks” svineiguo padūšona, kurā vīna nu desmit bolvys sajiemieju beja i Nautrānu kulturtelpa. 2025. godā tei tyka īkļauta Nacionalajā namaterialuo kulturys montuojuma sarokstā i ir tik ūtruo kulturtelpa nu Latgolys, kas tymā tykuse. Nautrānu kulturtelpā ītylpst Rēzeknis nūvoda Nautrānu pogosts, Iļžukolna pogosta daļa nu centra iz zīmelim i Ludzys nūvoda Mežavydu pogosta zīmeļu daļa, kas sevī īkļaun bejušuo Zaļmuižys pogosta i Nautrānu draudzis teritoreju. Jau pavysam dreiži kulturtelpā paradzātys jaunys nūtikšonuos, kuruos pīsadaleit aicynuoti vysi interesenti.

Nautrānu kulturys centra pasuokumu organizatore i kulturys projektu vadeituoja Inga Vigule par bolvu soka: “Puorstuovūt Nautrānu kulturtelpu “Boņuka” bolvys sajimšonā, pyrmuos sajiutys vysa dreižuok beja pateiceiba par nūviertiejumu vysam tam cylvāku dorbam i degsmei par sovu vītu i Latgolu, kas jau seņ teik dareits Nautrānu kulturtelpā. “Boņuks”, taipat i namaterialuo kulturys montuojuma vierteibys statusa sajimšona izlīk sova veida pīnuokumu palikt stypruokim, dareit i pieteit vaira, kai ari apsazynuot tū, ka tikai mes poši – kūpīna – varim radeit taidu vidi, kaidā gribim dzeivuot šudiņ i kaidu jū gribim pamest sovim bārnim – boguotu ar zynuošonom, styprom tradicejom i latgalisku.” Kai svareiguokūs Nautrānu kulturtelpys aizdavumus iz prīšku Inga Vigule izceļ viesturis pieteišonu, dzeivuošonu šudiņdīnā i ryupis par byušonu iz prīšku, kū ari kūpīnys aktivisti, līkūt golvys kūpā, nūteikti izdareis. Jau pavysam dreiži Nautrānu kulturtelpā byus divejis nūtikšonys – erudicejis spēle “Nu troki gudrys!” i folklorys boguoteibu mekliešona dobā foto orientiešonuos akcejā “Kur meikle?”.

Erudicejis spēle “Nu troki gudrys!”, kas nūteik jau catūrtū reizi, itūgod byus 21. martā 12 stuņdēs Nautrānu kulturys centrā. Spēlē byus vareiba puorbaudeit sovys zynuošonys i erudiceju par Latveju, Latgolu i Nautrānu kulturtelpu. Spēlis moto: “Nasabeist, ka koč kū nazynuosi, golvonais – cik daudzi tu izzynuosi!” Spēlē var pīsadaleit sevkura komanda ar vismoz divejim, bet ni vaira par sešim dalinīkim, i kotrys dreikst byut tikai vīnys komandys sastuovā. Svareigi, ka var pīsadaleit tikai tī dalinīki, kuri ir dasasacejuši, deļtuo tys juoizdora sovlaiceigai – da 18. marta, rokstūt iz e-postu inga.vigule@rezeknesnovads.lv voi sasazynojūt telefoniski, zvonūt 28335357. Dasacejumā juonūruoda dalinīku skaits i komandys nūsaukums. Spēlē var pīsadaleit sevkurs grybātuojs – daleiba ir bez moksys i vacuma īrūbežuojumu! Par muzykalim sveicīnim pasuokumā ryupēsīs Arņs Slobožanins.

Sovutīs nu 22. da 31. marta Nautrānu kulturys centrys aicynoj īt dobā i īpazeit Nautrānu kulturtelpys folklorys boguoteibu, vaicojūt meiklis, kas ir vuoktys Nautrānu kulturtelpys teritorejā i ir daīmamys portalā garamantas.lv. Kab dasasaceitu, juoroksta Nautrānu kulturys centra kulturys pasuokumu organizatorei Ingai Vigulei iz WhatsApp (tel. nr. 28335357). Dalinīkim tiks izsyuteita karte, kurā byus atzeimuotys aptyvanuos nūsaglobuošonys vītys. Dalinīkam juoatrūn meikle, juonūsabiļdej ar tū i juoatmiņ. Pi kotrys meiklis byus ari “špikereits” ar nūruodi, kur var savaicuot pareizū atbiļdi. Biļdis ar atrostajom meiklem da 31. marta pīcu vokorā juonūsyuta Ingai. Lobuokī maklātuoji i puorejī dalinīki tiks sveikti Leldīnis pasuokumā “Skaņuo Leldīne”, kas nūtiks 5. aprelī 12 stuņdēs.