Rokstu sagataveja: portals lakuga.lv

Itymā nedeļgolā, 22. martā, jau catūrtū reizi svieteisim Lībīšu montuojuma dīnu. Partū ituos nedelis īsacejumus sagataveja lībīšu kulturys aktivists, volūdnīks, dzejnīks, tulkotuojs i kas tik vēļ nā – Valts Ernštreits. “Itei ir tradiceja, kas, nu vīnys pusis, atguodynoj par tū, ka Latvejai ir boguotys saknis i myusu dīnu latvīšu volūda, kultura i ari myusu dīnu Latveja ir veiduojusēs nu daudzu sastuovdaļu – leidza latgalim, sielim, zemgalim i kuršim ari nu lībīšu. Nu ūtrys pusis, tei atguodynoj, ka lībīši ir na tik montuojums i atbaļss, bet ar sovom dzeivajom tradicejom, volūdu i pošapziņu turpynoj pastuovēt leidza,” soka Valts.

Ituos dīnys centrā ir tradiceja, kas rakstureiga tikai lībīšim – putynu mūdynuošona. Tamā sasavej senejais Baļtejis jiurys suomu mits par pasauļa rasšonūs nu iudiņa putyna ūlys i myusu dīnu lībīšu saikne ar jiuru, kas izapauž kai ticeiba tam, ka putyni puorlaiž zīmu ite pat – zam iudiņa i lada, kab pavasarī atsagrīztu jaunam suokumam. Taišni taipat kai poši lībīši.

Valtam itūgod putynus saīs mūdynuot viers iudiņu – koč kur dabasūs viers Atlantejis okeana, bet tim, kas Latvejā, jis eistyn īsoka apmeklēt kaidu nu Lībīšu montuojuma dīnys nūtikšonu!

Ka gribīs cylvākūs, tod var braukt iz Latvejis-Igaunejis rūbežu Ainažūs, kur Vydzemis lībiskuos kulturtelpys cylvāki kotru godu organizej plašu kūpā saīšonu, voi iz Līvu laukumu Reigā, kur lībīšu putynu mūdynuošonys tradicejā paleidzēs īsajust folklorys kūpys i lībīšu jaunīši, voi agrā reitā iz Kolkys rogu.

Ka gribīs pi vīna apmeklēt kaidu lībīšu piļskolnu – tod nūteikti juoapdūmoj braukšona iz Aizkraukli. Ka gribīs īsaklauseit myusu dīnu lībīšu volūdys skaniejumā džeziskūs rytmūs – ir vārts apmeklēt projekta “Kuolm randõ” koncertu Jiurmolā. Vaira informacejis i beleti ITE.

Tok, ka gribīs izbaudeit lībiskūs skaņu dziļumu, plašumu i kruosys – brauc iz Siguldu, kur obejus Gaujis krostus savīnoj Latvejis i lībīšu karūgim rūtuots tylts.

Par vysu – kai nūtikšonom, tai putynu mūdynuošonys tradiceju – vaira var atrast ITE, kai ari apsavērt eipaši itai dīnai sataiseitajā kartē zamuok.

Lai šmuks jaunais lībīšu gods!