Rokstu sagataveja: portals lakuga.lv

Leldīnē vysod ir cīši aktiva kulturys dzeive – koncerti, izruodis, ballis i cytys aktivitatis nūteik kai leluokajuos piļsātuos, tai mozuokajūs pogostūs. Portals lakuga.lv itymā rokstā īsoka pīcus pasuokumus vysaidom gaumem, tok ar vēļ vaira nūtikšonom var īpasazeit portala kalendara sadaļā.

Pyrmizruode Baļtinovā

Lela nūtikšona svātdiņ, Pyrmajā Leldīnē, gaidoma Bolvu nūvoda Baļtinovā. Tī pyrmizruodi pīdzeivuos amaterteatra “Palādas” jaunuokais īstudiejums “Naudas celi 2”, kas ir turpynuojums skateituojim jau labi zynomajai Danskovītis lugai “Naudas celi”. Izruodis režisors – Aigars Keišs.

“Apreļa pilīni” Iļžukolnā

Pyrmajā Leldīnē, 5. aprelī, iz daudzveideigu koncertu “Apreļa pilīni” vysi interesenti teik aicynuoti Rēzeknis nūvoda Iļžukolnā. Tymā dzīduos Iļžukolna pogosta tautys noma folklorys kūpa, ar pavasareigim sveicīnim uzastuos Iļžukolna tautys noma mozī dancari, Leldīnis tradicejis dzīsmēs i rūtaļuos izspielēs Ambeļu pogosta folklorys kūpa “Speiga”, ar jautrim daņčim sveicīņus ness cīmeni nu Ludzys nūvoda – Cyblys sīvīšu deju kūpa “EversS” i Ludzys nūvoda Bārnu i jaunīšu centra jaunīšu deju kolektivs “Žiks”, kai ari Veremu pogosta tautys noma videjuos paaudzis deju kolektivs “Kūzuls”. Pasuokumu vadeis Arnis Krancāns, tam sekuos balle ar Aināru Kaupužu.

Dekteru teatris Audriņūs

Ūtrajā Leldīnē, 6. aprelī, vareiba satikt vīnu nu popularuokūs Latgolys amaterteatru – Dekteru teatri – byus Rēzeknis nūvoda Audriņu kulturys nomā. Tī dekterīši ruodeis sovu jaunuokū izruodi “Vyss, kas nūteik, nūteik iz lobu!”, kuruos pamatā ir Danskovītis luga. Pasuokuma aproksts līcynoj, ka itamā reizē tuos darbeiba byus pīlāguota dīnai, kod izruode tiks ruodeita, i vysys sarežgeituos nūtikšonys, kas tamā teik izspālātys, atsarysynuos taišni Leldīnē.

“Latgalīša sirds” Ludzā

Ūtrajā Leldīnē ari latgaliska nūtikšona Ludzā – kulturys nomā gaidoms dzīduotuoja Jura Ostrovska i saksofonista Romāna Saikovska koncerts “Latgalīša sirds”. Aproksts līcynoj, ka koncertā skanēs īmeiļuotys Latgolys dzīsmis, melodejis i stuosti, kas pīpiļdeis sirdi ar syltumu, pavasara jutūni i eistynu latgalisku dvēseli. Tys byus muzykals ceļuojums cauri Latgolys sajiutom – nu lirisku i aizkustynūšu da prīceigu melodeju.

FK “Upīte” brauc iz “Goru”!

6. aprelī cīši latgaliska nūtikšona byus ari Latgolys viestnīceibā “Gors”. Tī gaidoms folklorys kūpys “Upīte” koncerts “Kod īt iz balli”. Teik sūleits, ka koncertā varēs izbaudeit i Zīmeļlatgolys daudzbaļseigū dzīduošonu, izceļūt pusbolsa dzīduošonu, i tradicionalū muziciešonu, i kolhoza laikūs dzīduotuos dzīsmis FK “Upīte” apdarē, i romancis, kai ari, prūtams, kūpeigu izadoncuošonu i sasadzīduošonu.