“Cytaidi latviskais” sezonys nūslāgums par kuozom, tortim i muzykantim

LaKuGa 8. Septembris, 2014. gods Comments Off on “Cytaidi latviskais” sezonys nūslāgums par kuozom, tortim i muzykantim

Raidejuma “Cytaidi latviskais’’ ūtruo sezona teik nūslāgta ar “gataveišonūs kuozom’’. Legendys par kuozom Latgolā byus dzierdiejs sevkurs i kotram itys skaistais nūtykums ari koč reizi byutu juopīdzeivoj pošam, partū natiks ruodeitys kuozys, nu stuosteits par naiztryukstūšom lītom, kas ir latgalīšu kuozuos.

Dzejnīks Valentins Lukaševičs Rūžupē satiks bruoļus Evaldu i Juoni Gulbinskus, kuri bejuši kuozu muzykanti vysmoz 300 nūvoda kuozuos. Bruolim pīsavīnuos apdzīduotuoja ar skaneigu bolsu i pikantim tekstim Elvīra Ušacka.  Byus i kuozu “mednīkstuosti’’, i muzyka ar dejom i Latgolys ols.

Kas ir kuozys bez eista lauku torta!? Tū Valentins Lukaševičs ceps kūpā Ainu Barsukovu, kas Latvejis Gūdu saimineicu saītā ir atzeita par lobuokū kuozu tortu cepieju. Par Ainys povuormuokslu zyna na tik Kuorsovys nūvoda Malnovys pogostā, nu juos izslavietūs brančus jau baudejuši daudzi Latgolys apceļuotuoji. Na tik tim, kas itūrudiņ gatavejās kuozom, bet vysim, kam breivuos šaļts pateik pavadeit kuknē eksperimentejūt, īsokam jimt pi rūkys recepšu kladi, partū ka torta recepti vārts pīraksteit.

“Cytaidi latviskais”, nūslādzūt ūtrū sezonu, cer otkon uzrunuot sovus skateituojus Latgolā i vysā Latvejā!

cytaidi latviskais muzykanti

 

Komentari slāgti.