Raiņa sātā Berkenelē gūdynuos breivdobys deju tradicejis

Raiņa sātā Berkenelē gūdynuos breivdobys deju tradicejis

Rokstu sagataveja: portals lakuga.lv

Sastdiņ, 11. majā, nu 18.00 stuņžu Augšdaugovys nūvodā, Raiņa sātā Berkenelē, nūtiks sareikuojums “Zaļumballe Berkenelē”, kab aktualizātu breivdobys deju tradicejis lauku vidē, informej pasuokuma organizatori. Vokora gaitā vysaidys nūtikšonys vadeis saimu foklorys studeja “Garataka” nu Reigys i Augšdaugovys nūvoda folklorys kūpys “Atzola”, “Neicgalīši”, “Pylna Sāta” i “Dyrbyni”.

Iz “Zaļumballi Berkenelē” aicynuoti tradiceju izzynuotuoji i popularizātuoji, amaterkolektivu vadeituoji i daleibnīki, vītejī dzeivuotuoji, gosti, turisti, sevkurs interesents. Sareikuojumā vālams īsarast tautystārpā voi 19. g. s. beigu svātku drēbēs, bet īīšona ir bez moksys.

Plānuots, ka 18.00 stuņdēs suoksīs folklorys kūpu dyžuošonuos – koncerts, kurā saimu studeja “Garataka” i Augšdaugovys nūvoda folklorys kūpys “Atzola”, “Neicgalīši”, “Pylna Sāta” i “Dyrbyni” izdzīduos pavasara i siejis laika dzīsmis. Sovutīs nu 19.00 stuņžu sevkurs ir gaideits meistarklasēs, kuruos byus vareiba vuiceitīs tradicionalūs breivdobys deju sūļus. Taipat ari varēs nūdegustēt kulinaruo montuojuma lobumus. Nu 20.00 stuņžu da poša saulis rīta nūtiks zaļumballe, kurys laikā byus i rūtaļdaņči vysai saimei, i latvīšu i latgalīšu daņči, i vaļši i šeibers ar “dzeivū” muzyku. Sareikuojuma laikā dorbuosīs bufets, kur par moksu byus daīmamys aizkūdys i bezalkoholiskais zelters.

Raiņa sāta Berkenelē nūdrūsynoj autentisku lauku sātys/saimisteibys vidi tradiceju prezentiešonai i eistynuošonai myusu dīnuos. Ite teik reikuoti vysaidi pasuokumi kūpā ar folklorys kūpom: Dzejis dīnys, breivdobys izruodis, godskuortu tradiceju svātki, čyguonūs īšona i cyti. Itūgod teik aktualizātys breivdobys deju tradicejis, iz kū īdvasmuoja storpnūzaru muokslys grupys “Serde” 2018. godā veiktais pietejums par zaļumbaļļu tradicejom Latvejā i tuos izdūtuo tradiceju būrtneica “Zaļumballes”, kurā tyka īkļauti ari ostoni stuosti par zaļumbaļļu tradicejom Augšdaugovys nūvoda teritorejā.

Berkenelis pusmuiža ir Vaļsts nūzeimis viesturis pīminieklis i zynoma kai īvārojamuo latvīšu literata i sabīdryskuo darbinīka Raiņa (Juoņa Pliekšāna) (1865 – 1929) bierneibys zeme. Berkenelē leidz pat myusu dīnom ir sasaglobuojuse 19. godu symta lauku vide: sāta, staļs, kliets, duorzs. Daugovpiļs rajona padūme sātu restaurēja 1995. godā, piec goda tei aizsuoce sovu kulturviesturiskū miseju kai Raiņa sāta Berkenelē.


Print Friendly, PDF & Email

Kalenders

May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]
13:00 Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
May 30 @ 13:00 – 14:30
30. majā 13.00 stuņdēs RCB Grīziņkolna filialbiblioteka (Alauksta īlā 10) aicynoj iz sasatikšonu ar Juri Cybuli. Jurs Cybuļs ir volūdnīks, tulkuotuojs, publicists i školuotuojs, kurs vaira nakai 40 godu pietej i kolekcionej ābecis. Jurs Cybuļs[...]