Rūku rūkā tyvuok uzvarai! Ilgtermiņa atbolsts Ukrainai

Rūku rūkā tyvuok uzvarai! Ilgtermiņa atbolsts Ukrainai

Rokstu sagataveja: Marta Puzāka, portals lakuga.lv

Jau paguojs pusūtrys gods nu tuos šausmeiguos viests, ka Krīveja ībruka Ukrainā. Lai ari cik pa itū laiku asam spiejuši sadzeivuot ar situaceju, nadreikst aizmierst, ka kars vys vēļ nūteik i Ukrainys aizstuovi naatlaideigi ceinejās par sovu i myusu breiveibu. Portals lakuga.lv grib atguodynuot, ka materials i namaterials atbolsts, taipoš ari dūmu spāks Ukrainai vys vēļ ir cīši svareigs ceļā iz napasadūšonu i spieju uzveikt nalobū!

Finansialī zīduojumi

Vīns nu svareiguokūs i vīgluokūs atbolstu ilgermiņā ir taišni zīduošona finansiali. Kai īprīšk, tai ari niu labdareibys organizacejis “Ziedot.lv” platformā sevkurā šaļtī var pazīduot finansialus leidzeklus vysvysaidom zīduojumu kategorejom. Ar naudu ir vareiba nūdrūsynuot ukrainu karaveiru maļteitis i mediciniskū paleidzeibu, dronus i dzeramuo iudiņa atteireišonys stacejis, bruņuvestis Ukrainys medikim, školys autobusus i daudz kū cytu. Aktualuokūs projektus verīs ITE.

Daži nu aktualūs Ukrainys zīduojumu projektu platformā Ziedot.lv

Kai pīruodejums tam, ka mes eistyn varim, ir jau 31 realizāts zīduojumu projekts, kur kūpeigim spākim tyka savuokti napīcīšamī leidzekli – autobusi, medicinys precis, syltais iedīņs, breivpruoteigūs dorbs, apgierbs ukraiņu aizstuovim i vēļ cytys svareigys lītys.

Finansialūs leidzekļus var pazīduot, izmontojūt organizacejis rekvizitus vai ari zvonūt 90006086. Zīduojums par vīnu zvonu ir 1,42 eiro.

Zīdoj kotru mienesi ukraiņu atbolstam! Nav svareigs zīduojuma apmārs, tok tuo regularitate. Caur platformu STOPIFY ar kasmieneša zīduojumu var abonēt atbolstu Ukrainys bruņuotajim spākim. Par 6,99 eiro voi leluoku zīduojuma sumu var paleidzēt nūdrūsynuot Ukrainys armejai vajadzeigū ekipiejumu i cytys svareigys lītys. Par armejis vajadzeibom informej Ukrainys viestnīceiba Latvejā, sovpus par zīduotajim leidzeklim vajadzeigū guodoj “Ziedot.lv” darbinīki, kas piečuok dūd ari atskaitis zīduotuojim. Tei ir vareiba, kai kotrys varim dzeivuot ar sajiutu, ka dorom koč kū lobu i peļnejom karmys pluseņus, a na tik pasivi veramēs viests.

STOPIFY mobiluo lītuotne

Taipoš ari portalā var puorskaiteit interveju ar “Stopify” dybynuotuoju Māri Upenieku, kurs pa dzymšuonai īt nu Preiļu. Intervejā var īpazeit juo personeigū stuostu lelajā reklamys pasaulī, taipoš, kai roduos ideja par platformu i kaidi izaicynuojumu leiklūči bejuši da tuos realizacejis. Interveju skaiti ITE.

Puorskaiti ari cytus rokstus par Ukrainys tematiku

Portals lakuga.lv vairuoku mienešu garumā aktivi viesteja par Ukrainys kara atspaidim Latgolys kontekstā. Latgolā ir cīši daudz sirsneigu i drūsmeigu cylvāku ar eipašim stuostim, kas naatlaideigi paleidziejuši nalaimē tykušajim, īsastuojūt par Ukrainu i nūsūdūt Krīvejis kara nūzīgumus.

Taipoš ari ar Ukrainys tematiku Latgolā saistuos Latvejis-Krīvejis pīrūbeža apleicīne, kas ari jiut geopolitiskuos situacejis īspaidu. Portals lakuga.lv gasteja četrūs dažaidūs pīrūbeža cīmūs, raugūt izzynuot dzeivuotuoju nūskanuojumu, kasdīnys ritmu i eipašuokūs stuostus, kas saistuos ar vītejū apleicīni. Rokstu sereju tyka nomināta arī Latvejis Žurnalistu asociacejis (LŽA) “Izcileibys bolvai 2023”. Pīrūbeža cīmu stuosti. Gološova (+FOTO) – lakuga.lv

Pošu ukraiņu skaudrī stuosti

Taipoš ari cyti Latvejis medeji turpynoj viesteit par Ukrainu i tuos cylvākim Latvejā, veidojūt na tik viests, tok ari personeiguokys intervejis, kur atsakluoj puordzeivuojumi i emocejis. Vīns nu taidu projektu ir Daugovpiļs naatkareigo medeja chayka.lv i RUS TVNET projekts «Мы здесь», kur teik veiduoti video stuosti par cylvākim, kas biegļu gaituos īsaroduši iz dzeivi Latvejā, pagaisynojūt sovus kvāluokūs sapynus, īrostū dzeivi, taipoš ari leidzcylvākus. Tī ir smogi, tok patīsi stuosti, kurus byutu juoīpazeist sevkuram.

Ukrainys simbolika kasdīnā

Kotram nu myusu byutu labi īvīst koč kaidu moziņku daleņu nu Ukrainys sovā kasdīnys dzeivē, taidā veidā paruodūt, ka mes naasam aizmiersuši par tū. Par pīmāru, tei var byut kaida pīspraudeite pi apgierba, gruomatzeime, uzleimis. Tys ir ari cīši nūzeimeigi ukrainim, kuri palykuši Latvejā – redzēt atbolsta zeimis, rodūt apzini, ka jī nav vīni, bet pastuov sovstarpeja tolerance i cīns.

Taipoš tei ari var byut na viņ simbolika, tok ari kulturys elementi – klausīs ukraiņu muzyku, verīs kinys, skaiti ukraiņu autoru gruomotys i vysu kū cytu, kas saistuos ar Ukrainys spieceigū tautu i tuos izpausmem.

Ukrainys simbolika gostu sātā “Pie Pliča”, foto Amanda Anusāne/portals lakuga.lv

Pazīdoj na viņ naudu

Taipoš sevkurā šaļtī vys vēļ ir vareiba zīduot ari materialuos lītys, kuru nikod navar byut par daudz. Ir zynoms, ka Ukrainā dzeive vys vēļ nav stabila i pūstejumu atjaunuošonai ir vajadzeigs laiks, taipoš ari Krīvejis armeja napuorstuoj veiduot jaunus trīcīņus. Deļtuo ir cīši svareigi nūdrūsynuot ukrainus ar kasdīnā svareigom lītom, koč taidā veidā atvīglojūt jūs kasdīnu.

Bīdreiba “Tavi Draugi” Reigā, Ventspiļs īlā 50, aktivi pījam zīduojumus – apgierbs, higienys produkti, puortyka, sadzeivis i saimisteibys precis.

Taipoš ari ilgtermiņā ukraiņus atbolsta preilīts Igors Pličs, kur sovā gostu sātā “Pie Pliča” vysod prīcojās atvastim zīduojumim ci maskiešonās teiklu peišonys entuziastim, piečuok tūs nūdūdūt tviterkonvojam, kas brauc iz Ukrainu, voi ari bīdreibai “Tavi Draugi”.

Ari portals lakuga.lv gasteja pi Igora Pliča, kab izzynuotu jū redzīni par kara situaceju, pīredzi paleidzeibys snēgšonā i tuos šaļts aktualajom zīduošonys vareibom. Interveju skaiti ite: Cylvāka svātuokuo miseja ir kolpuot cytim cylvākim. Saruna ar Igoru Pliču – lakuga.lv

Bīdreibys “Tavi Draugi” aktualī zīduojumi
Print Friendly, PDF & Email

Kalenders

Feb
23
Pīk
18:00 Ūtrais čangaļu saīts ci latgalīš... @ Ūzulainis tautys noms
Ūtrais čangaļu saīts ci latgalīš... @ Ūzulainis tautys noms
Feb 23 @ 18:00 – 23:00
23. februarī nu 18.00 da 23.00 stuņžu Ūzulainis tautys nomā nūtiks ūtrais “Čangaļu saīts ci latgalīšu olimpiade”, aicynojūt iz prīceigu i gordu laika pavadeišonu latgaliskā atmosferā. Tei nav tipiska olimpiade, jo tamā varēs: pasasmīt par[...]
19:00 Grupys “Galaktika” albuma prezen... @ Valmīrys Kulturys centrs
Grupys “Galaktika” albuma prezen... @ Valmīrys Kulturys centrs
Feb 23 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]
Feb
24
Sai
14:00 Koncertizvadums “Atgriežamies La... @ Latvejis Nacionalais teatris
Koncertizvadums “Atgriežamies La... @ Latvejis Nacionalais teatris
Feb 24 @ 14:00 – 16:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]