Izdūts “Rūžupis veiru” pyrmais albums

LaKuGa 20. Oktobris, 2015. gods Comments Off on Izdūts “Rūžupis veiru” pyrmais albums

R____upis_veiri_561e13f5c5606Kulturys i menedžmenta centrys “Lauska” oktobra pyrmajā pusē izdevs folklorys kūpys “Rūžupis veiri” pyrmū albumu, kurā vydā ir ostoņpadsmit latgalīšu tautysdzīsmis.

Folklorys kūpa “Rūžupis veiri” dybynuota 2009. goda janvarī Leivuona nūvodā. Kūpa ir vīna nu rešajom veiru folklorys kūpom Latvejā, tuos vadeituojs ir Dainis Paeglis i kūpā dorbojās septeni kuorteigi veiri nu Leivuona, Rūžupis i Sutru. Veiri muzicej i dzīd par olu, mārgom, karu i cytom veirim svareigom temom. Tikū izdūtajā albumā atrassit kai cīši pazeistamys (“Guoju pa mežu”, “Lobs bej’ puika myusu Jezups”), tai ari mozuok dzierdātys latgalīšu tautysdzīsmis.

Albuma īroksts taiseits studejā “Lauska” skaņu iņženera Kaspara Bārbala vadeibā. Sūpluok dzīšmu īrokstim “Rūžupis veiru” albumā atrūnomi ari vysu dzīšmu vuordi i eisi dzīšmu temu stuosti ari angliski. Albumu var nūpierkt “Lauska” albumu tierdznīceibys vītuos, škārsteikla veikalā, kai ari bīdreibys “Latgolys Studentu centrs” latgalīšu gruomotu i disku goldā.

Albums izdūts ar Vaļsts kulturkapitala fonda atbolstu.

Albuma “Rūžupis veiri” dzīšmu saroksts:
1. Taidu olu padareju
2. Guoju pa mežu
3. Tī bej’ labi olu dzert(i)
4. Ai zaļuo egleite
5. Tuoli dzeivoj
6. Īsim syla maleņā(i)
7. Tymsa, tymsa tei naksneņa
8. Muote dieleņu auklēja
9. Muote soka šyupuodama
10. Īsalaižu ierbu šauti
11. Seši jauni bandinīki
12. Oi, Dīveni, loba laime
13. Padareju oluteņu
14. Treis gadeni saturieju
15. Dzieru, dzieru olu
16. Pļuovu sīnu
17. Es nu sovu mozu dīnu
18. Lobs bej’ puika myusu Jezups

Viesti sagataveja Edeite Husare

Komentari slāgti.