LaKuGa jau viesteja par Latvejis Televizejis projektu “Viens ciems. Visa Latvija”, kuruo ītvorūs Latvejā zynomi rakstnīki brauce iz mozapdzeivuotom vītom, kur īsapazyna ar vītejim dzeivuotuojim i pieteja vītu viesturi i kulturu.

Treis rakstnīki — Māris Bērziņš, Nora Ikstena i Pauls Bankovskis — itūvosor brauce iz nūmaļom Latvejis vītom, kab, īpazeistūt tūs viesturi i dzeivuotuojus, rostu īdvasmu stuostim i īmyužynuotu Latveju eisai pyrma tuos symtgadis. Nora Ikstena brauce iz Slutiškim, seneju krīvu staraveru cīmu, kas izavītuojs pi Daugovys lūku. Slutišku dzeivuotuoji līlejās ar sovu pošizveiduotū buļbu škirni i lūgu ramus vys vēļ kruosoj kūši zylā kruosā, partū ka tei sorgojūt saimi nu ļaunuo. Nora Ikstena uzklausa daudzus cytus liktiņstuostus i legendys, raugūt saprast, parkū, celinīks, reizi pabejs nalelajā cīmā, vaira naspiej tū aizmierst i gryb atsagrīzt.

Piec gasteišonys Slutiškūs ir radeita na tik dokumentaluo kina, nu ari Norys Ikstenys stuosts “Pagānu krūze”. Latvejis Televizejis sātys lopā stuostu var i puorskaiteit, i nūbolsuot par vīnu nu trejim projekta laikā radeitajim latvīšu rakstnīku dorbim, nu kurūs vīns cytugod varātu tikt ekranizāts.

Kartenis: ekranšuovīņs nu dokumentaluos kinys i nu LaKuGys arhiva