Julī nūtiks Latvejis kulturu festivals “Pynu, pynu sītu”

LaKuGa 19. Apreļs, 2016. gods Comments Off on Julī nūtiks Latvejis kulturu festivals “Pynu, pynu sītu”

Latvijas folkloras festivals_logoJuļa suokuos Daugovpilī i vysā Latgolā nūtiks Latvejis kulturu festivals “Pynu, pynu sītu”, kū organizej bīdreiba “Dienvidlatgales NVO atbalsta centrs” sadarbeibā ar Daugovpiļs piļsātys dūmi, Daugovpiļs piļsātys dūmis Kulturys puorvaļdi i Latvejis Nacionalū kulturys centru.

Daleibai festivalā “Pynu, pynu sītu” teik aicynuoti dasasaceit Latvejā dzeivojūšūs mozuokumtauteibu tradicionaluos kulturys muokslinīcyskī kolektivi (folklorys kūpys, etnografiskī ansambli, deju kolektivi i cyti), kurī kūp i popularizej sovys tautys kulturys tradicejis. Dasasokūt festivalam, da 2. maja škārsteiklā juoaizpylda dasacejuma anketa, nu iz e-postu festivals@nvoc.lv juoaizsyuta treis lobys kvalitatis kartenis.

Festivala laikā 1.-2. julī Daugovpilī nūtiks vērtine vysaidu koncertu, festivala dalinīku guojīņs, meistarklasis kolektivu vadeituojim i cytys aktivitatis, sovukuort 3. julī ir planavuoti koncerti Latgolā i nūslāguma koncerts Kuorsovā.

Festivala mierkis ir popularizēt, atteisteit i pylnveiduot Latvejā dzeivojūšūs mozuokumtauteibu tradicionaluos kulturys montuojumu, mudynuot mozuokumtauteibu dzeivuotuojus izprast sovys kulturys nūzeimi Latvejis kulturvidē, kai ari aktivizēt sabīdreibys leidzdaleibu namaterialuos kulturys montuojuma (tymā skaitā mozuokumtauteibu) izzynuošonā, praktiziešonā i nūdūšonā tuoļuok.

Festivala organiziešonu atbolsta LR Kulturys ministreja i Vuocejis viestnīceiba Latvejā.

Festivala nūlykums

Festivala programa

Komentari slāgti.