Roksti latgaliski. 7. nūdarbeiba

LaKuGa 17. Marts, 2017. gods 0
Roksti latgaliski. 7. nūdarbeiba

Turpynojam pīduovuot materialu latgalīšu rokstu volūdys apgiušonai. Pamats aizdavumim jimts nu 2007. godā LR Tīslītu ministrejis Vaļsts volūdys centra izdūtajim Latgalīšu pareizraksteibys nūsacejumim.

7. NŪDARBEIBA

Eipašeibys vuordu, kuortys skaitļa vuordu, vītnīkvuordu i divdabu veirīšu dzimtis vīnskaitļa nominativa nūteiktuo golūtne ir -ais: lobais, pyrmais, munejais, kurais, nasamais, paguojušais.

Napareizys rokstu volūdā ir formys ar -īs: lobīs, pyrmīs, munejīs, kurīs, nasamīs, paguojušīs.

Daudzskaitļa genitiva golūtne veirīšu i sīvīšu dzimtis eipašeibys vuordam, kuortys skaitļa vuordam, vītnīkvuordam i divdabam ir -ūs. Ite vairs nav tūs pyrmūs atliduojušūs malnūs strodu.

Apstuokļa vuords vēļ <– itai rokstoms.

Prīvuordi deļ, nu, pi <– itai rokstomi.

Kūpā i škierti rokstomi vuordi:

Kūpā rokstomi apstuokļa vuordi

aiz-: aizkuo,aiztuo;

deļ-: deļkuo, deļtuo;

naz-: nazcik, nazkai, nazkod, nazkur;

pa-: paceļu, pamozam, papylnam;

par-: parkū, partū

Prīvuordus aiz, deļ, par kūpā ar vītnīkvuordu roksta škierti: aiz kuo (aiz tuo), deļ kuo (deļ tuo), par kū (par tū).

Voi jiuti starpeibu?

Parkū tu šudiņ runuoji ar jū? (Kāpēc tu šodien runāji ar viņu?) Par kū tu šudiņ runuoji ar jū? (Par ko tu šodien runāji ar viņu?)

Aizkuo jis taids prīceigs? (Kāpēc viņš tik priecīgs?) Aiz kuo tu stuovi ryndā? (Aiz kā tu stāvi rindā?)

Deļkuo tu pierc itū gruomotu? (Kāpēc tu pērc šo grāmatu?) Deļ kuo tu pierc itū gruomotu? (Kam tu pērc šo grāmatu?)

 

Škierti rokstomi apstuokļa vuordi

naviņ: cik naviņ, kai naviņ, kod naviņ, kur naviņ;

nabejs: cik nabejs, kai nabejs, kod nabejs, kur nabejs;

koč: koč cik, koč kai, koč kod, koč kur;

kod: kod cik, kod kai, kod kod, kod kur.

Saiklis, kas latvīšu volūdā ir “un”, latgalīšu rokstuvolūdā ir — i. (Radīs nu vacuokys formys — *ir.)

Apstyprynuojuma partikula — nui (latv.lit. volūdā jā). Nūlīguma partikula — nā (latv.lit.volūdā nē).

Cytys bīžuokuos partikulys — koč, kod, viņ, naviņ, kazyn, nazyn.

Latgalīšu volūdā dzeivys ir supina formys — tuos roksta ar -tu, -tūs i lītoj ar darbeibys vuordim, kas apzeimoj kusteibu, — īsim gulātu, skrīsim mauduotūs.

 

Puorbaudi sevi!

Lic vuordu latgaliski!

Babai, kai jau vysod, golvā beja _________ (raibais) skusts.

Tys ir muns _________ (otrais) dzejūļs.

Voi niu dzīd _________ (tavējais) dāls?

Kotrs __________ (gatavais) torts ir eists mokslys dorbs.

_________ (kāpēc) tu naēd?

Es nazynu, ___________ (kāpēc) izmyra dinozauri.

Bruoļs nūlyka bumbu ___________ (aiz tā) gaļdeņa.

__________ (par ko) šudiņ školuotuoja stuņdē stuosteja?

Īsim ________ (meklēt) paslāptū montu?

__________ (jā), īsim! ________ (nē), es šudiņ nagrybu.

__________ (pie) kuo ir munys gruomotys?

___________ (to) tovu gruomotu nav nikur.

Tovai sātai vairs nav __________ (lielo) lūgu?

___________ (kāpēc) tu _______ (vēl) naēd _______ (jauno) buļvu?

Puorejuos nūdarbeibys meklej pošvuiceibys materialā Vuicīs raksteit latgaliski!, aizdavumu atbiļdis atrūnamys ite.