Latgolys Centraluo biblioteka svieteis 80 godu jubileju

LaKuGa 4. Oktobris, 2017. gods Comments Off on Latgolys Centraluo biblioteka svieteis 80 godu jubileju
Latgolys Centraluo biblioteka svieteis 80 godu jubileju

Oktobrī ar boguotu pasuokumu programu Latgolys Centraluo biblioteka atzeimuos sovys pastuoviešonys 80. godadīnu, informej bibliotekys puorstuove Inga Gedžūne. Golvonī jubileja pasuokumi paradzāti mieneša beiguos nu 23. da 27. oktobra.

Latgolys Centraluos bibliotekys pyrmsuokumi vaicojami 1937. godā, kod Daugovpiļs piļsātys vaļde vērsēs Daugovpiļs Latvīšu bīdreibā i Daugovpiļs Školuotuoju bīdreibā ar lyugumu nūdūt tūs gruomotu kruojumus vaļdis puorziņā, kab iz ituos bāzis izveiduotu publisku biblioteku, kuruos pakolpuojumi byutu breivi daīmami vysim piļsātnīkim. Sovys pastuoviešonys laikā biblioteka nūmaineja vairuokus nūsaukumus, puorcīte Ūtrū pasauļa karu i guņsgrāku, kurā guoja būjā gondreiž vyss gruomotu kruojums – vaira par 40 tyukstūšom eksemplaru. Tok, par speiti vysim satrycynuojumim, bibliotekys dorbs turpynuojuos, tei atdzyma, auga i atsateisteja, mainūtīs laikam leidza. 21. godu symtā Latgolys Centraluo biblioteka īguoja kai myusdīneiga, daudzfunkcionala kulturys i izgleiteibys īstuode ar uztycamu skaiteituoju lūku, atsauceigu personalu, boguotu gruomotu kruojumu, atjaunuotom, funkcionalom telpom viesturiskajā Vīneibys nomā, kai ari sešom filialem dažaidūs piļsātys mikrorajonūs.

Sovu 80. jubileju biblioteka atzeimuos oktobra pādejā nedeļā, nu 23. da 27. oktobra, kod skaiteituojim i cytim interesentim tiks pīduovuota boguota pasuokumu programa. Vysu jubileja mienesi Nūzaru literaturys sektorā byus apsaverama interaktiva izstuode “Kad pagātne tiekas ar nākotni”. Tei īpazeistynuos ar Latgolys Centraluos bibliotekys viesturi, suocūt ar 20. gs. 30. godim. Bet jubileja nedeļā Daiļliteraturys sektorā byus daīmama autografātūs gruomotu izstuode “Īpaša grāmata bibliotēkā”. Ekspozicejā tiks īkļauti Daugovpiļs autoru duovuotī izdavumi, kai ari gruomotys, kurymuos sovus īrokstus atstuojuši populari Latvejis i uorvaļstu autori, kas nazkod gastejuši bibliotekā. Jubileja nedelis izskaņā ituos gruomotys atsagrīzs bibliotekys plauktūs i iz prīšku byus atpazeistamys piec uzleimis “Īpaša grāmata”.

Jubileja nedelis programā paradzāti ari vairuoki pasuokumi. Nedeļa suoksīs ar virtualuos izstuodis “Latgales Centrālajai bibliotēkai – 80” prezentaceju. Taipat gaidoms “randeņš” ar Daugovpiļs literatim, aktivuokūs skaiteituoju apbolvuošonys ceremoneja, sasatikšona ar bibliotekys bejušajim darbinīkim i sadarbeibys partnerim, kai ari konkurss Facebook lītuotuojim. Eipaša duovona skaiteituojim bibliotekys jubilejā byus sasatikšona ar īmīļuotū rakstneicu Nuoru Ikstenu sarunā par juos romānu “Mātes piens” bibliotekys nūzaru literaturys sektorā 26. oktobrī 14.00.

Komentari slāgti.