“Pi myusim Latgolā” par paradzātū školu reformu

LaKuGa 10. Decembris, 2017. gods Comments Off on “Pi myusim Latgolā” par paradzātū školu reformu
“Pi myusim Latgolā” par paradzātū školu reformu

Pādejūs nedeļu laikā lelu rezonaņsi sabīdreibā izsauce planavuotuo izgleiteibys reforma. Izgleiteibys ministrejis sātyslopā publicāts pietejums, kurs paradz Latgolā reorganizēt 21 vydsškolu, atstuojūt viņ pamatškolys. Kab izskaidruotu itū vaicuojumu, raidejumā “Pi myusim Latgolā” Tenis Bikovskis sasatyka ar izgleiteibys ministru Kārli Šadurski, vīnu nu pietejuma autoru, kai ari Saeimys deputatim i izgleiteibys darbinīkim.

Vīns nu pietejuma autoru ir ekonomgeografs Juoņs Turlajs, kurs nūruoda, ka pietejuma pasyuteituojs ir Izgleiteibys i zynuotnis ministreja: “Vīns nu aizdavumu beja saprast, kai izgleiteibys jūmā Latveja varātu tyvuotīs Eiropys leimiņam, vysmoz Eiropys videjam leimiņam. Niu mes tierejam 1,6 reizis vaira kai videji Eiropys vaļsts izgleiteibai, tok tys rezultats ir gaužom naīprīcynūšs, i mums datryukst naudys ceļu uzturiešonai i veseleibai.”

Pietejūt tūs vaļstu pīredzi, iz kuruom cieški peļņā brauc latvīši, Juoņs Turlajs pamanejs, ka tī izgleiteibys sistema ir lobuok strukturāta. Taipoš jis nūruoda, ka sābri igauni, eistynojūt leidzeigys izgleiteibys reformys, niu tykuši daudz tuoļuok.

Izgleiteibys i zynuotnis ministrs Kārlis Šadurskis nūruoda, ka pietejums beja vajadzeigs, kab apkūpuotu kvalitativus faktus, kab piečuot tūs izvierteitu i izstruoduotu reiceibys planu.

Komentari slāgti.