Itūgod gruomotu svātku programā tyka īkļauts ari latgalīšu literaturai veļteits pasuokums „Sova ustoba” ar latgalīšu sīvīšu tekstim i sarunom. „Sovā ustobā” 6. oktobrī sasatyka Anna Rancāne, Emīleja Kalvāne, Iveta Ratinīka, Dagneja Bramane, Ireta Čekse i Ilze Sperga.

Sasatikšona īsasuoce ar žurnala „A12” prezentaceju – par žurnala rošonuos viesturi, saturu, atteisteibu stuosteja Inga Čekša Ratniece. Nu vīns nu golvonajim sasatikšonys īmeslim beja dreižumā paradzātuo diveju jaunu dzejis gruomotu izīšona – Emīlejis Kalvānis dzejūļu kruojums „Atvosora” i Ingrīdys Tāraudys kruojums „Bolts šokolads”, kas deve īrūsmi latgalīšu sīvīšu sasatikšonai ar sovim tekstim.

Atguojušī pīdzeivuoja breineigu īspieju – kluotīnē dzierdēt Emīleju Kalvāni, kas, nasaverūt iz slimeibu, nav zaudiejuse dzievis i dorba prīcu. Ingrīda Tārauda, kas niu dzeivoj Īrejā, pasuokumā beja nakluotīnē – juos dzeju gon latvyski, gon latgaliski eistyni atkluoja Nacionaluo teatra aktrise Inga Misāne, puorsteidzūt saguojušūs ar breineigū latgalīšu volūdu. Ar sovim dorbim prīcieja ari Anna Rancāne, Dagneja Bramane i Iveta Ratinīka, nu eipaši interesna i gona korsta izavierte sarunu daļa par raksteišonu latgaliski i literaturys vierteibu i byušonu kai taidu.

Pīdovojam īsavērt „Sovā ustobā” ar karteņu paleigu. Foto Kristīne Pokratniece