Ūzulu stateišonys tolka Upeitē kūpā ar Imanta Zīdūņa fondu “Viegli”

Ūzulu stateišonys tolka Upeitē kūpā ar Imanta Zīdūņa fondu “Viegli”

Viļakys nūvoda Škilbānu pogosta Upeitis cīms nabeidz puorsteigt. Te nūteik kasgadiejī pasuokumi, kai festivali “Pulkā eimu, pulkā teku”, “Upeitis Uobeļduorzs”, “Svātki Upeitē”, kurim apmaklātuoji gatavejās laiceigi, rezervejūt  laiku sovūs grafikūs i izabreivejūt nu daudzūs dorbu, nu tod ir taidi nagaideitī pasuokumi. Tūs nav laika izreklamēt, partū ka tī nūteik pieški i nagaideiti. 

20. aprelī naparosti darbeigs i sirsneigs pasuokums nūtyka Upeitē. Namaterialuo kulturys montuojuma centra “Upīte” direktors Andris Slišāns aicynuoja rodus, draugus, Upeitis pamatškolys audziekņus i Imanta Zīdūņa fonda “Viegli” puorstuovus iz ūzulu stateišonys tolku. Atzeimojūt Latvejis Republikys 93. dzimšonys dīnu, Ontons Slišāns kūpā ar bārnim, dūmubīdrim i aktivim cylvākim sastateja jaunajā parkā natuoli nu Upeitis pamatškolys 75 ūzulus. Cytūs godūs ari tyka īstateits kaids ūzuleņš. 20. apreļa tolkā īstateja 37 kūceņus. Itūšaļt parkā ir īstateits ap 150 ūzuleņu.

Upeitē sevkuru dorbu īsuoc ar dzīsmi. Imanta Zīdūņa fonda “Viegli” puorstuovus Upeitis pamatškolys audziekni sagaideja ar dzīsmi, īsuocūt ūzulu stateišonu, Upeitis jaunīšu folklorys kūpys meitys i sīvys skandēja dzīsmi, tolka beidzēs ar kūpeigu sasadzīduošonu Upeitis tautys nomā. Dzīduoja i muzicēja Renārs Kaupers, Muora Upmane-Holšteine, Juoņs Strapcāns, Žaneta Jaunzeme-Grende, gitarists Enriko Plivcs, paleidzēja ari Andris Čeksters i Ants Grende. Ar dzīsmem atbiļdēja Upeitis bārni, meitys i sīvys. Atkluojam, ka vysvīnkuoršuokuo sasadzīduošonys forma ir taida, kur vīns nūdzīd rindeņu i puorejī atkuortoj tū pošu tekstu.

Itūgod grupa “Prāta Vētra” dūsīs koncertturē “7 soļi svaiga gaisa”. Grupys solists Renārs Kaupers asūt dzierdiejs, ka Latgolā beja sacalta ažiotaža, ka koncerttura laikā nivīns koncerts nanūtiks Latgolā. “Tei nav taisneiba. Šudiņ “Prāta Vētra” ir Upeitē i snādz koncertu”, saceja smaideigais Renārs Kaupers.

“Pyrma sešu godu sasapuļcēja dūmubīdru grupeņa, kas izdūmuoja, ka nikas navar byut lobuoks par tū, kai pajimt luopstu, gruobekli, futbolbumbu, kaidu muzykys instrumentu i aizbraukt piec īspiejis tuoļuok nu Reigys. Myusu pyrmais braucīņs beja iz Latgolu – iz Bierzpili. Godā veicam itaidus 8, cytureiz pat 10 braucīņus. Sovu septeitū sezonu suocom ar ūzulu stateišonu Upeitē,” viesturi atkluoja “Mazās kavalērijas” aktivs bīdrs Renārs Kaupers. “Mes gribiejom lobu dareit sev i cytim, savylkom paralelis ar dyžkūku atbreivuotuoju grupu, īsapazynom ar Imantu Zīdūni, tod tyka nūdybynuots fonds “Viegli”, kas turpynoj saglobuot Imanta Zīdūņa idejis. Viņgod pyrmū reizi nūtyka konkurss “Laiks Ziedonim”, kurā raugom cyldynuot cylvākus, kurim ir degsme, stuoja i syuteiba. Nominacejā nūvodpietnīceibā “Kedas” uzvarēja Slišānu saime. Īsapazynom, sasadraudziejom i partū šudiņ asam kluotyn, kab stateitu ūzulus. Myusu “Mazā kavalērija” stota, kruosoj, vuoc akmiņus, ceļ tiļteņus, laipenis. Braucom iz sovom dzymtajom vītom i tī, kur myus paaicynoj,” pībylda Juoņs Strapcāns.

Muora Upmane – Holšteine kūpā ar mozū meiteņu Ronju atkluoja: “Mes jutomēs kai sovejī. Jutomēs kai sātā. Prīcuojamīs, ka myus uzjem tik sirsneigai. Dorbs šudiņ nabeja gryuts i paveicem pavysam veikli. Kūpeiga pastruoduošona vysod salīdej. Prīca, ka jiusu jaunīši ir pozitivi i aktivi. Turit jaunīšus pi dzīšmu, deju i dobys. Ka Viļakys nūvodam byus jaunīši, tod byus ari spāks nūvodam!”

“Šudiņ jutomēs pacyluoti, īprīcynuoti. Asam sasatykuši ar vītejim Upeitis dzeivuotuojim, kuri mums vuica dejis i dzīd vysaidys dzīsmis ar spieceigim vuordim, spieceigim bolsim i meļdenim. Asu prīceigs, ka te es sajemu goreigu energeju. Mes asam jauki pastruoduojuši, īstatejom ūzuleņus. Ceru, ka myusu stateitī ūzuleni augs. Turpynojit turēt gora līsmeņu, kab ari kaidi vieji pyustu!” vielēja Juoņs Strapcāns.

Renārs Kaupers saceja: “Itys ir lobs laiks. Maņ vysod ir patykuse šaļts, kod tyvojās pavasars, tyuleņ vyss zaļuos i saplauks. Dzeive otkon byus daudz kruošņuoka i skaistuoka. Tai ir sevkurā sferā, atguodojit, ka tī aiz muokūņu ir saule. Lai jums vysim labi īt i itū cereibu paturit sevī!”

Informaceju sagataveja Vineta Zeltkalne sadarbeibā ar Namaterialuos kulturys montuojuma centra “Upīte” direktoru Andri Slišānu
Kartenis: Vineta Zeltkalne i Andris Slišāns

Print Friendly, PDF & Email

Nūtikšonu kalendars

May
8
Sai
10:00 Diskuseju cikls “Ar Eiropys tvie... @ Zoom
Diskuseju cikls “Ar Eiropys tvie... @ Zoom
May 8 @ 10:00 – 14:00
Diskuseju cikls "Ar Eiropys tvierīni Latgolā" 2021 @ Zoom
Lai veicynuotu jaunīšu radūšū dūmuošonu i ideju radeišonys spieju, uzlobuotu prezentaceju i komunikacejis prasmis, kai ari mudynuotu jaunīšus pīsadaleit sabīdreibai svareigu vaicuojumu rysynuošonā, ituo gods pavasarī turpynoj reikuot pasuokumu ciklu “Ar Eiropys tvierīni Latgolā”.  8.[...]
20:00 Gundegys Rancānis gleznu izstuod... @ Latgolys Kulturviesturis muzejs
Gundegys Rancānis gleznu izstuod... @ Latgolys Kulturviesturis muzejs
May 8 @ 20:00
Gundegys Rancānis gleznu izstuode "Klātesot" @ Latgolys Kulturviesturis muzejs
Nu 14. apreļa da 8. maja Latgolys Kulturviesturis muzeja lūgu vitrinuos ir īspieja apsavērt muokslineicys Gundegys Rancānis gleznu izstuodi “Klātesot”. Karteņa: rezekne.lv
May
9
Svā
12:00 Koncerts “Pasavēros saulītē” @ YouTube
Koncerts “Pasavēros saulītē” @ YouTube
May 9 @ 12:00
Koncerts "Pasavēros saulītē" @ YouTube
Sagaidūt Muotis dīnu, Kulturys i tautys muokslys centrs “Ritums” pīduovoj virtualu tautys muzykys koncertu “Pasavēros saulītē”. Nu 9. maja 12.00 stuņdem tū varēs apsavērt kulturys centra YouTube kontā ITE. Koncertprogramu taisejuši Aīda, Asnate i Aurēlija[...]
15:00 Folklorys kūpys “Saime” dzīduošo... @ Vactilžys pogosts, Bolvu nūvods
Folklorys kūpys “Saime” dzīduošo... @ Vactilžys pogosts, Bolvu nūvods
May 9 @ 15:00
Folklorys kūpys "Saime" dzīduošona pi krucifiksu @ Vactilžys pogosts, Bolvu nūvods
Maja mieness nuok ar tradicionalīm maja dzīduojumim pi krucifiksu. Bolu nūvoda Vactilžys pogostā kotru maja svātdini 15.00 stuņdēs pi krucifiksu dzīduos foklorys kūpa “Saime”. Itūņedeļ – pi Malvīnes sātys.   
20:00 Māra Čačkys izstuode “Klātienes ... @ Daugovpiļs Nūvodpietnīceibys i muokslys muzejs
Māra Čačkys izstuode “Klātienes ... @ Daugovpiļs Nūvodpietnīceibys i muokslys muzejs
May 9 @ 20:00
Māra Čačkys izstuode "Klātienes dialogi" @ Daugovpiļs Nūvodpietnīceibys i muokslys muzejs
Muokslys dīnu ītvorūs Daugovpiļs Nūvodpietnīceibys i muokslys muzejs aicynoj iz muokslinīka Māra Čačkys dorbu izstuodi “Klātienes dialogi”. Izstuode byus daīmama nu 26. apreļa da 9. maja.  Vaira par Māra Čačkys izstuodi ITE. Izstuodi varēs apsavērt[...]