Rokstu sagataveja: portals lakuga.lv

Pi skaiteituoju tics deveitais Cybuļu Jura sastateitais jūku i anekdotu kruojums – “Īdzersem iz celekuojes!”. Itūreiz kūpā ar sastateituoju pi tuo struoduojuši Krakopu Zintis i Krapacu Ļuce, bet gruomotys vuoka autors, kai īrosts, ir Slyšanu Prancs. Jaunajā izdavumā var na tik puorskaiteit jūkus, tok izzynuot ari, kū par “ceļakuoju” sauc vysaiduos pasauļa vaļstīs, i puorsalīcynuot, ka Bolvu nūvoda Kryšāni pretendej iz Latgolys jūku golvyspiļsātys statusu.

Jurs Cybuļs da ituo sastatejs i izdevs ostoņus jūku i anekdotu kruojumus: “Īdzer veina, lai dzeive ira feina!” (1999), “Īdzer ols, lai bāduom ira gols!” (2015), “Ka dzersi šnabi, moš byus labi!” (2017), “Ka samagonka goldā, to prīca apleik volda!” (2019), “Byusi vasals!” (2020), “Vieļ pa vīnai i da dybuna!” (2021), “Groznuo kuorta” (2023) i “Ai kū saslymi, ai tū juozaārstej” (2024). Lai ari vysys gruomotys, piec nūsaukumu sprīžūt, it kai veļteitys dzeršonai, Cybuļu Jurs pastreipoj, ka “reizem var īdzert, bet, kuo soka, ai māru, bet labi pajūkuot vāg kotru dīnu”.

Sastateituojam itūreiz tolkā guojuši diveji pastuoveigī kruojumu autori: Zintis Krakops i Aina Korkla aba Krapacu Ļuce. Aina ir leidzautore gondreiž vysim itim jūku i anekdotu kruojumim, ari Zintis jau struoduojs pi leluokuos dalis nu tūs. Kruojumā, leidzeigai kai īprīšk, apkūpuoti kai anekdoti, tai gadīni nu dzeivis. Krapacu Ļuce itūreiz nu krīvu volūdys puortulkuojuse i lokalizējuse ari vairuokus skeču scenarejus.

Namaineigi kotrys autors sovus jūkus rakstejs taidā volūdā, kaidā pats runoj. Jurs Cybuļs gruomotys īvodā nūruoda: “Teksti ira autoru dzymtejā volūdā, tys ira, muotes voi tāva volūdā. Nav gadejīs dzierdiet, ka kuods byutu sacejs, ka jis runoj sova tāva voi muotes dialektā voi izlūksnie. Kuo raksteits pyrmuos jūku gruomatas īvodā, bez muotes volūdas cylvaks ira garīgi nabags.”