Rokstu sagataveja: portals lakuga.lv

Latvejis Sabīdryskuo medeja Latgolys multimedeju studeja, kas atsarūn Rēzeknē, aicynoj dorbā korespondentu, kurs spiej komunicēt latgaliski i jau ir tics pi īprīškejis pīredzis ziņu žurnalistikā, viestej publiski daīmamuo informaceja. Korespondenta golvonī pīnuokumi byutu gataveit audio sižetus, reportažys i intervejis, atspīgeļuot aktualitatis tīšajā eterā, gataveit tekstus i pīsadaleit multimedeju satura veiduošonā.

Korespondenta pīnuokumu vydā byutu ari īrūsynuot idejis i tematus, sekuot leidza procesim, kai ari meklēt, vuokt, analizēt i apstruoduot informaceju par politikys, ekonomikys, socialajom i kulturys nūtikšonom Latgolā, izmontojūt vysaidus informacejis olūtus.

Nu potencialuo korespondenta teik praseita pīredze ziņu žurnalistikā; vālama augstuokuo izgleiteiba (komunikacejis zynuotnē voi tai pītyvynuotā zynuotnē); kritiskuo dūmuošona, analitiskuos spiejis; zynuošonys, interese i spieja mudri orientētīs Latvejā i cytur pasaulī nūteikūšajūs procesūs; prasme organizēt sovu dorbu, lobys komunikacejis prasmis i stresa nūtureiba; atbiļdeiba, precizitate, prasme struoduot mudri i kvalitativi; loba dikceja, izcylys latvīšu volūdys zynuošonys, spieja komunicēt latgaliski i svešvolūdu prasmis dorbam ar uorvaļstu informacejis olūtim; lobys datorprasmis, vālamys skanis montažys programys lītuotuoja prasmis; pamatprasmis foto uzjimšonā, vīnkuorša video īraksteišonā; B kategorejis autovadeituoja aplīceiba.

Sūleituo olga ir nu 1500 eiro (bruto), dorba vīta Atbreivuošonys alejā 90, Rēzeknē, ar vareibu struoduot attuolynuotai.

Dasacejums (CV i motivacejis viestule) ar nūruodi “Latgales multimediju studijas korespondents” juoīsyuta iz darbs@lsm.lv da 1. augusta.

Latvejis Radejis Latgolys multimedeju studeja Rēzeknē tyka atkluota 2016. godā. Tuos aizdavums ir taiseit sižetus i raidejumus vysim pīcim Latvejis Radejis kanalim, viestejūt par nūtikšonom i procesim Latgolys regionā. Sūpluok ziņu sižetim i raidejumim latvīšu i krīvu volūduos, pastuoveigi teik pīduovuots saturs ari latgalīšu volūdā. Studejis komanda veidoj divejus kasnedelis raidejumus latgaliski – informativi-analitiskū raidejumu “Latgolys stuņde” (skaņ pīktdīnem 15.05 Latgolys regiona apraidē i škārsteiklā) i kulturys raidejumu “Kolnasāta” (skaņ sastdīnem 18.15 Latvejis Radejis 1. kanalā).