Rokstu sagataveja: Laura Spundere/portals lakuga.lv

Septembra vydā Rēzeknis Centralajā bibliotekā tyka atkluots žurnalistis Marutys Latkovskys izdavums “Ar mani Latgola tai runojās…”, kurā apkūpuota informaceja par 50 izcylom personeibom latgalīšu literaturā. Tymā atrūnami citati, dzeivis fakti i cyta informaceja, kas snādz īskotu Latgolys literaturys viesturē.

Izdavuma redaktore – rodūšūs projektu autore i filologe Skaidreite Svikša – atkluošonā saceja, ka suokumā asūt bejuse ideja sagataveit spēli (kaitu), kur kotrai personeibai tyktu veļteits kaids vīns truopeigs citats. “Mums pylnys gruomatneicys ar slovonu latvīšu i uorzemu personeibu citatu gruomotom, dūmuoju, ka taidu vajag ari par latgalīšim. Marutai sātā tik lela biblioteka, es jai saceju, ka vajadzātu pajimt i atlaseit pa kaidam citatam, jei tai aizaruove, ka laikam vysys gruomotys puorskaiteja,” ar smaidu stuosta Skaidreite Svikša.

Piec Skaidreitis saceituo, izdavumam ir sova struktura – puslopu kairajā pusē ir personeibys fotografeja, kam sekoj svareiguokuo informaceja par kotru cylvāku i taipoš kaidys tuo cylvāka atzinis, citati voi dorbu fragmenti. Taipoš pi sevkurys personeibys aproksta ir dalykts ari kvadratkods, kurs aizvad iz kaidu tīšsaistis vītni, kur daīmama papyldu informaceja.

Taipoš izdavumā publicāti ari diveji Juoņa Klīdzieja dorbi – stuosts “Sapuļce pi Kolumbejis upis”, kuruo pyrmpubliciejums bejs žurnalā “Dzeive” 1970. godā, i tāluojums “Es saredzieju tū uperi…” (Aleksandra Batnis pīmiņai), kas pyrmūreiz publicāts “Tāvu zemis kalendarā” 1969. godā. Kūpumā izdavumā ir informaceja par 50 personeibom, tūs vydā ari Fraņcs Trasuns, Kazimers Skrynda, Fraņcs Kemps, Konstaņce Daugule-Kempa, Mikeļs Bukšs, Jurs Placinskis, Leonards Latkovskis, Norberts Trepša i cyti.

Atkluošonys pasuokumā Maruta Latkovska dalejuos ar Ludzys gimnazejis direktora Juoņa Turkupuoļa 1928. godā “Latgolys školys” 11. numerī raksteitū: “Latgalīšim agri voi vieli, bet byus sova literatura, kur tautai ir īpatnejis sovys goreiguos vierteibys i sovs zynoms dvēselis nūskaņuojums, tī ari nūsadybynoj pastuoveiga literatura.”

Maruta ari pastreipoj, ka apkūpuotuos personeibys nav izalaseitys najauši, vys, kai jau viestej izdavuma nūsaukums “Ar mani Latgola tai runojās…”, ar vysim 50 cylvākim Marutai ir bejuse kaida personeiga sasapazeišona, sadarbeiba, dorba lītys, voi ari jūs darbeiba, roksti, stuosti, romani ir pamatuši kaidu ītekmi iz pošu Marutu.

“Nivīnā augstškolā mani nav tai izgleituojuši, kai struodojūt ar Marutys kuņdzi, lobojūt tekstus symtu reižu i papyldynojūt, i vēļ nazkū atrūnūt. Tys ir eistyn aizraunūšs process, es niu asmu par 50 personeibom gudruoka palykuse,” doluos izdavuma redaktore Skaidreite Svikša.

Apkūpuojums drukuotā versejā daīmams Rēzeknis Centraluos bibliotekys Nūvodpietnīceibys kruojumā, sovpus digitali tū var puorskaiteit ITE.

Foto galerejis autore Amanda Anusāne/ portals lakuga.lv