Rokstu sagataveja: portals lakuga.lv

Kulturys īsacejumus itai nedeļai sagatavejuse Daugovpiļs teatra aktrise Jūlija Ļaha, kura novembra vydā spūdrai sevi paruodeja titullūmā jaunuokajā izruodē latgaliski “Hekube”. Jūlija īsoka pasuokumus, kas saisteiti ar Zīmyssvātku gaideišonys laiku – meistarklasi, izruodi i koncertu.

Piparkūku grūzeņu meistarklase

11. decembrī 17.20 stuņdēs Daugovpiļs Vīneibys noma Tradiceju sātā varēs īniert svātku aromatūs i sataiseit pats sovu smuordeigū piparkūku grūzeņu! Syltys sarunys, rodūšs gors i gordi rezultati – vyss vīnā breineigā darbneicā. Piparkūku meistare Mārīte Kronberga īvuiceis gataveit piparkūku grūzeņus, ar kū puorsteigt sovejūs. Pīsavīnoj i sajiuti eistū Zīmyssvātku garšu!

Eistyna komedeja “Sniega gūstā”

Kod snīgs aizlādz durovys i liktiņs īslādz vīnā telpā divejus piļneigus pretstotus, tod suocās nūtikšonys, kas sylda vaira nakai korsts čajs. Naprognozejamys situacejis, smīkli da osoru i zīmys burveiba, kas satyvynoj. Sevkuru sirdi uzrunuos aizkustynūšs i nagaideitim atkluojumim boguots stuosts iz Daugovpiļs teatra skotivis 12. decembrī 18.30 stuņdēs kūpā ar akterim Jūliju Ļahu i Ritvaru Gailumu.

Adventa koncerts “Siltā gaismā”

Adventa laiks – cylvāki otkon suoc ticēt lobajam i sātā īīt mīrpylns klusums. Itys laiks ir klusa gaisma goda tymsuokajuos dīnuos – šaļts, kod nūstuot, īelpuot dziļuok… Koncerta “Siltā gaismā”, kas 13. decembrī 19 stuņdēs byus Stabuļnīku kulturys nomā, dalinīki – Gunta Greisle (vokals), Edijs Strušels (klavīris), Ainārs Kiserovskis (vokals) – grib itū gaismu īdegt kūpā ar jums – ar dzīsmem, vuordim, syltumu.