Roksta autore: Amanda Anusāne/portals lakuga.lv

Jaunais gods lelai daļai atīt ar apsajimšonu vaira kustētīs i byut dobā. Ka svātkūs daudzi āsts i moz kustāts, portals lakuga.lv pīduovoj ideju, kai tū lobuot! Koč i zīmai pīstuov snīgs i svātkim – boltums, kas niu beidzūt ari sagaideits, juosaskota šmukais sevkurūs laikapstuokļūs. Kod zemi nasadz bīza snīga kuorta, breivi var tikt kluotyn vysaidom stygom i apsavieršonys objektim, kurūs Latgolā natryukst. Itūreiz pīduovojam apļveida puorguojīņa maršrutu dobys parkā “Daugovys lūki” storp Sluciškom i Vasargelišku skotu tūrni.

Puorguojīni var īsuokt kai nu Vasargelišku skotu tūrņa, tai nu Slucišku sādžys pusis, tok, ka brauc ar mašynu, tod lobuok tū byus pamest stuovlaukumā pi skotu tūrņa ITE. Itūreiz mes guojom nu ūtrys pusis, pamatūt mašynu ceļa nūmalē pi kempinga “Daugavas lokos”, kas, cyta storpā, ir draudzeigs latgalīšu volūdai, tok zīmys sezonā tī byus klusums. Natuoli nu kempinga atsarūn ari Slucišku vacticeibnīku lauku sāta, kurū itūreiz maršrutā naīkļuovem, kam tei dorbojās piec īprīškeja pīroksta.

Maršruts ir aptyvai 15 km garš i drupeit reljefains. Byus juokuop pa trepem, kai ari juoīt puori tiļtenim, kas zīmā voi slapņā laikā var byut sleideigi. Maršruts nav markāts, tok nūīt nu stygys ir gryuši. Vystik īsoku zamynluodēt maršrutu, kū sagatavejuši dodiesdaba.lv. Tī atrassi ari cytu nūdereigu informaceju i puorguojīņu idejis pa Latveju.

Puorguojīņa suokums vad pa Slucišku grovu stygu, kas ir aptyvai 2 km gara i nūvess tevi da Slucišku krostam (kraujai), kuruo augstums ir 40,9 m, bet garums – 400 m. Krosta nūguozis sleipums ir 38 grādi. Ka nasajiuti tik fiziski spieceigs, tod da krosta vari tikt ari pa vīgluokū ceļu, kas vad gar pošu upis krostu.

Tok vysaidus taidus interesantus objektus kai luoci, “Rogonu muojeņu”, naudys pūdu i turysma informacejis stendus varēs redzēt, īmūt pa aušku.

Vysys Slucišku grovu stygys garumā labi radzama Daugova – izbaudi upis burveibu i sasaelpoj svaiga gaisa. Teritoreja ari ir boguota ar vysaidim augim, kurūs vystik lobuok meklēt pavasarī, vosorā i rudinī. Taipat atguodynoju, ka maršruts atsarūn eipaši aizsorgojamā teritorejā, kur nav pīļaunama guņs kūršona i apsamesšona naatļautuos vītuos, bet taidam nūlyukam ir īkuortuotys vairuokys teritorejis – vīna pi poša krosta (kraujis), ūtra – pi skotu tūrņa. Koč ari tī ir speciali paradzātys vītys atkrytumu izsvīsšonai, īsoku vysu, kū atnesi, pajimt leidza i izsvīst cytur.

Kod byusi nūguojs pyrmū i garuokū pūsmu gar upi, golā redziesi Vasargelišku skotu tūrni, kas ir 21 m augsts i, kurā izkuopūt, pa labi var redzēt Daugovys upis Rozališku lūku, tok pa kreisi – skotu, kas nazkod rūtuoja 10 latu banknoti. Taipat ari ite byus vīta, kur pīsēst i atjaunuot spākus. Atpakaļceļš vess cauri meža, asfalta i granta saguma celim. Lai laimeigs 2026. gods i breineigs puorguojīņs!

Fotografeju autore: Amanda Anusāne