Rokstu sagataveja: portals lakuga.lv

Svineigā pasuokumā paziņuoti Latvejis muzykys īrokstu goda bolvys “Zelta mikrofons 2026” nominanti, suocūt ceļu iz bolvys 30 godu jubilejis ceremoneju, kas nūtiks 28. februarī Ventspilī, viestej publiski daīmamuo informaceja. Nominantu vydā ari vairuoki muzykys īroksti, kurūs var dzierdēt latgalīšu volūdu, tymā skaitā folklorys kūpys “Grodi” albums “Sudrabu smeldama”.

Tautys voi pasauļa muzykys nominacejā izvierzeiti pīci albumi. Četrūs nu tūs dzierdama ari latgalīšu volūda. Par vysulatgaliskuokū var skaiteit folklorys kūpys “Grodi” albumu “Sudrabu smeldama”, kurā skaņ Latgolys dzīsmis i tautys muzyka, kurū “Grodi” ar etnografisku precizitati puormontuojuši sovā repertuarā. Albums papyldynuots ar teicieju personeiguos pīredzis stuostim, izceļūt Latvejis lauku dzeivuotuoju nagaistūšuos i vys aktualuos gora vierteibys. 

Albumā “Sudrabu smeldama” atrūnamys dzīsmis i tautys muzyka nu Latvīšu folklorys kruotivis ekspedicejom, Emiļa Melngaiļa pīrokstim, Mārtiņa Boiko veiktajim īrokstim i folklorys kūpys “Grodi” vadeituojis Aīdys Rancānis personeigūs arhivu – dzīsmis i daņči nu Bolvu nūvoda Brīžucīma, Medņovys, Viļakys, Bierzpiļs i Škilbānu pusis, Kruoslovys nūvoda Izvolta, Dagdys, Ezernīku, Ludzys nūvoda Nierzys i Mežavydu pogosta. Taipat ari Sibirejis latgalīšu montuojums, kurū sovulaik Timofejevkys cīmā īrakstejs Latvīšu folklorys kruotivis pietnīks i “Grodu” dalinīks Aigars Lielbārdis. Muzyka sasavyn ar teicieju personeiguos pīredzis stuostim – albums papyldynuots ar vīnpadsmit audio fragmentim, kurūs atsakluoj kai sīvītis kasdīnys sūļs i gryuteibys, liktiņa kryudys, tai ari puorlaiceiga misejis apziņa i spāka olūts, audzynojūt bārnus i saglobojūt goreigū teireibu.

Latgalīšu volūda skaņ ari grupys “The Baltic Sisters” debejis albumā “Värav / Vārti / Vartai” (igauņu, latvīšu i leitovīšu volūdā “vuorti”). Tī atrūnama dzīsme “Soka saule rītiedama” nu teiciejis Domicelys Līpenis (1901-1992) dzīšmu pyura. 1991. godā tū nu teiciejis īrakstejs etnomuzykologs Mārtiņš Boiko i muzikologe Gita Lancere. Grupā apsavīnuojušys četrys dzīduotuojis – Liene Skrebinska i Vineta Romāne nu Latvejis, Mariona Selgalla nu Igaunejis i Laurita Peleniūte nu Leitovys.

Ari Ņujorkā dzeivojūšuos džeza vokalistis i komponistis Artys Jēkabsonis albumā “Dziesmu kamoliņš” īkļauta kai vīna dzīsme latgaliski – “Sēju rūtu, sēju mētru” –, tai instrumentala “Ziedi, ziedi, rudzu vārpa” aranžeja.

“Zelta mikrofona” bolvai itamā kategorejā nomināta ari etnomuzykys izlase “Sviests 11”. Deveņpadsmit skaņdorbu vydā tī atrūnamys ari divejis dzīsmis latgaliski – folklorys kūpys “Upīte” skaņdorbs “Gonu reps” i trio “Bille” aba Lienis Skrebinskys, Annys Patrīcijis Karelis i Katrīnys Karelis īdzīduotuo “Tymseņš guoja”.

Sovutīs lobuokuo indie voi alternativuos muzykys albuma kategorejā nominantu vydā ari grupys “Juuk” īroksts “Tulkojumi”, kurā grupa radejuse folkroka versejis par vysaidu tautu i autoru dzīsmem latvīšu volūdā. Albumā atrūnama ari dzīsme latgaliski “Ak, nōc, Emanuel”.

Folklorys kūpys “Grodi” īroksts “Sudrabu smeldama” i “Juuk” īroksts “Tulkojumi” sovā vydā sasaceņš lobuokuo albuma dizaina kategorejā. “Grodu” albuma dizainu veiduojuši Aurēlija Rancāne i Artūrs Analts, bet “Juuk” albuma – Līva Drauga.

Lobuokuo storpžanru voi instrumentaluos muzykys albuma kategorejā nominantu vydā ari Daumanta Kalniņa i Latvejis Radejis kora solistu īroksts “Tu stipru mani sauc”, kas veļteits Bronislavai Martuževai. Nivīna nu tymā īkļautūs dzīšmu nav latgaliski, tok ir ari veļtejums Latgolai – “Uz Latgales mīlīgiem kalniem”, kas ir pošys Martuževys sacerāta dzīsme ar Kārļa Skalbis vuordim.

Itūgod “Zelta mikrofona” bolvys tiks padūtys 20 nominacejuos, no kurūs cikom kas zynomys 16 (ar pylnu nominantu sarokstu var īpasazeit ITE). Bolva par myuža īguļdejumu Latvejis muzykys atteisteibā itūgod tiks padūta postfolklorys grupai “Iļģi”.

“Zelta mikrofona 2026” apbolvuošonys ceremoneja nūtiks 28. februarī Olimpiskajā centrā “Ventspils”. Tū ruodeis ari TV3 tīšraidē.