Rokstu sagataveja: portals lakuga.lv

Viesturiski tolka Latgolā nav bejuse tikai dorbs – tei vysod bejuse ari byušona kūpā, paleidziešona sābram i eistyna ļustiešona. Taišni itū sajiutu ar jaunu spāku i latgalisku eistumu Latvejis Universitatis deju ansamblis “Pērle” kūpā ar 13 muzikim puorvierš muzykalā latvīšu skotiviskuos dejis izruodē “Iz zaļa zora”, kurys pyrmizruode nūtiks 28. februarī Līpuojis Olimpiskuo centra Rūžu zālē. 

Nu malnroksta da izaugušai skotivis stuosta versejai

Paguojušajā godā skateituoji Leivuonā i VEF Kulturys pilī, Reigā, īraudzeja ituo dorba pyrmū verseju, kas tyka taiseita ansambļa “Pērle” 15 godu jubilejai. Par tū portals viesteja ITE. Tok, kai pastreipoj rodūšuo komanda, jaunuo izruode nabyus atkuortuojums – niu tei ir ap 30 minutu garuoka, saturiski dinamiskuoka i boguotuoka, kai ari ar izteiksmeiguoku dramaturgiskū lineju. 

“Pošam ruodīs cīši simpatiska itei tema par tolku Latgolā, i beja gribiešona tū atteisteit i sataiseit vēļ kruošņuoku, lai redz piec vareibys vaira cylvāku Latvejā,” soka izruodis horeografs i režisors Juris Gogulis.

100 % latgaliski – kai volūda, tai nūskaņa 

Izruode ir piļneibā veiduota latgalīšu volūdā, kas dramaturgejai daškir eipašu koloritu i emocionalu tiveibu. Tei baļsteita Latgolys folklorys materialūs i pīredzis stuostūs. Paguojušuo gods izruodis versejai nūsaukumam tyka izalaseits latvīšu literarajā volūdā, tok niu ari tys ir pasamejs. “Ka jau izruode ir par Latgolys cylvākim i jūs dzeivi, tod ari nūsaukumam i volūdai juobyut latgaliskai,” tai Juris.

Stuosta centrā ir mārga, kura atkluoj sovu pīdareibu Latgolai i caur kasdīnys tolku sovā sātā atguodynoj par spieceigū kūpā byušonys tradiceju. 

Muzykys i dejis spāks

Apmaklātuojus sagaida 80 minutu gars gaišs, prīceigs i energiskys stuosts. Iz skotivis kūpā ar “Pērles” doncuotuojim byus 13 vysaidi muziki – muzykaluo apvīneiba “Upes muzikanti”, grupa “Rūžupis veiri” i muzykaluo apvīneiba “Bille”.

Muzykys aranžejis ir eipaši veiduotys itai izruodei, tok vizualū pasauli radejuse scenografe Laura Šalma, kura izruodi raksturoj kai stuostu par latvīšim, kurī muok kai kuorteigi pastruoduot, tai svieteit kūpā byušonu. 

Juris Gogulis, kurs vaira zynoms nu veiksmeiguos izruodis “Vēja stāsts” i sajiems vairuokys Dejis bolvys nominacejis, “Pērles” kolektivā dorbojās jau nu 2010. gods. Itys projekts jam ir eipašs na tik profesionali, bet ari personeigi. “Maņ cīši pateik muzykalais teatris, kur muzyka i deja sasavyn iz skotivis. Myusu energiskajā Latgolys stuostā tū varēs just,” tai Juris. 

Piec 28. februarī Līpuojā gaidomuos pyrmizruodis “Iz zaļa zora” skotivis gaitys turpynuos 28. martā Latgolys viestnīceibā “Gors”, Rēzeknē, 26. aprelī – Ūgris nūvoda kulturys centrā, bet 16. majā – Reigā, tierdznīceibys centrā “Sāga”. Beletus iz izruodem var nūpierkt ITE.

“Brauc tolkā, jem leidza draugus i sābrus. Ka nasagrib struoduot, tod vysmoz pasaver iz ļusteigu dzeivuošonu,” aicynoj doncuotuoji.