Rokstu sagataveja: portals lakuga.lv

Latgalīšu hiphopa muokslineica Ūga apsavīnuojuse ar sīvīšu vokalū trio “Juos īluos līluos”, kab klauseituojim nūdūtu jaunu dzīsmi i videoklipu “Show must go on” – skaņdorbu kai manifestu, kas īsastuoj par muzyku kai golvonū vierteibu rodūšajā ceļā, viestej muokslinīku atsyuteituo informaceja.

“Juos īluos līluos” ir latgalīšu mārgu trio, kurā kūpā saguojušys Laura Svikša, Deina Misāne i Amanda Lapa – treis dažaidys personeibys, kurys vīnoj spieceiga kīmeja sovā vydā i kūpeiga sajiuta ap muzyku kai eistu i patīsu izpausmi.

Singlā trio vokaluo harmoneja sasavej ar myusdīneigu R&B i soul skaniejumu, kas organiski papyldynoj Ūgys tīšū i gūdeigū viestejumu. Dzīsmē i videoklipā atsakluoj na tik vokaluos spiejis, bet ari attīksme – stuoja pret industrejis fasadi, marionetem i tukšu uorejū spūzmi.

“Itys projekts apvīnoj munu muzykalū gaumi, papyldus tei ir breivuoka platforma i kolektivs, ar kurū eksperimentēt. Cīši lela prīca gataveit i raksteit vokaluos partejis i bekvokalus. Runojūt par nūskaņu, “Juos īluos līluos” ir taidys, kas var atsaļaut vaira byut kaisleiguokys, rūtaleiguokys, bet ar kvalitati i sovpateibu muzykā,” tai izasoka Laura Svikša.

“Maņ itys trio ir vareiba sevi īraudzeit mārgu sastuovā i daleitīs ar sovu īškejū muzykalū pasauli. Tei ir vareiba īpazeit ari cytu meitu redziejumu i kūpeigi radeit kū jaunu i patīsi eipašu,” soka Deina.

Grupa “Juos īluos līluos” sataiseita, kod Ūga dorbuojuos pi Seimaņa Putāna īrokstu platis, par kurū vaira vari izzynuot ITE. Tamā vīnam dzejūļam tyka maklātys treis eipašys vokalistis. Lai ari grupa pastuov saleidzynūši nailgu laiku, sastuovs ir mainejīs, leidz atrosta ituos šaļts organiski sadereiguo trejūtne. Niu kai grupa, tai dzīsme izdūta muzykys izdevnīceibys “Ausmeņa Records” paspuornē, i “Juos īluos līluos” oficiali palykuse par tuos daļu. Taipat sovu solo karjeru itamā izdevnīceibā aizsuokuse Deina Misāne ar skotivis vuordu Dei, kura niu jau izlaiduse divejis dzīsmis – “Muns boyfrends ir NEO” i “Tova mozuo”.

Dzīsmis videoklipu fiļmēja i montēja Evita Broka-Frolenkova. Fiļmiešonys i sasagataveišonys process nu idejis da realizacejai nūtyka gondreiž tik sīvīšu kolektivā. Projektā pīsadaleja ari doncuotuojis Jana Bondare i Mila Pavkšto, tok par grimu pasaryupēja Vita Bringule. 

“Asu pateiceiga Ūgai par uzaticiešonu i rodūšu breiveibu. Itys projekts maņ deve vareibu eksperimentēt, meklejūt sovu redzīni, i īlikt tymā daļu nu seve. Process beja organiskys i īdvasmojūšs. Eipaši aizraunūši beja struoduot ar tik spieceigu i kvalitativu skaņdorbu, kas deve papyldu rodūšū impulsu i energeju vysam projektam,” soka videoklipa autore Evita.

Sīvīšu rodūšū komandu papyldynuoja ari Marika Čerņavska, kura paleidzēja ar žongliešonys pamatim i vajadzeigū inventaru. Dorba process palyka par aplīcynuojumu tam, ka sīvīšu kolektivs var byut na tikai profesionals, bet ari cīši draudzeigs i produktivs.

“Videoklipa fiļmiešona beja rikteigi kruta – Evita ir tys cylvāks, ar kurū grybātūs sasadorbuot ari iz prīšku. Patyka myusu kompanejis atmosfera – varēja just, ka asam ar vīnu mierki, partū vyss guoja dīzgon raiti i rodūši, bet tymā pat laikā cīši syltai. Maņ ruodīs, ka asam īsuokušys itū ceļu,” tai Laura.

“Parosti es asu baileiga, kod zynu, ka byus juofiļmej videoklips. Ruodīs, ka navariešu atsaraiseit, bet itūreiz mes vīna ūtru atbaļstejom i uzmundrynuojom. Ari videografe Evita beja cīši atbolstūša i atvārta vysom idejom, kas beja padūmā īprīšk, kai ari roduos fiļmiešonys laukumā. Bauda, bauda, bauda,” komentej grupys dalineica Amanda.

Videoklipa taiseišonā kai sadarbeibys partneri īsasaisteja Latgolys viestnīceiba “Gors” i teatris “Joriks”, nūdrūsynojūt telpys idejis eistynuošonai. Par gaismu dizainu pasaryupēja Kristaps Kalabanovs.

Galerejā biļdis nu videoklipa fiļmiešonys. Foto: Evita Broka-Frolenkova