Rokstu sagataveja: portals lakuga.lv

Leldīnis dzīsme, Ludzys repera Idzhys jaunumi i apvīneiba ar Ūgu vydā – itī ir muzykys jaunumi, kurī cikom kas palykuši naizstuosteiti martā, deļtuo portala lakuga.lv skaiteituoju viereibai marta muzykys, par kurū nav viesteits pyrma atseviški, ziņu apkūpuojums.

Pavasara atīšona ar “Dārdaru” Leldīnis dzīsmi

“Dārdari” ir jaunīšu deju kolektivs, bet iz itū Leldīni jis īrakstejs divejis jaunys dzīsmis, kas asūt topušys, īsadvasmojūt nu tradiceju, dobys pasamūsšonys i kūpā byušonys prīcys. Vīna nu dzīšmu – “Karit, bruoli, šyupeleitis”* – īt nu Preiļu pusis. Kai viestej kolektiva sagataveituo informaceja, pādejā laikā jis padora plotuokus sovys rodūšuos izasaceišonys rūbežus i sūpluok doncuošonai “Dārdaru” dalinīki vuicuos ari latvīšu tradicionalū dzīduošonu pi školuotuoju Zanis Šmitis i Edgara Lipora. Kolektiva muokslinīcyskuo vadeituoja ir Lilija Lipora, kurys saknis īt nu Latgolys – Bolvu nūvoda Viļakys pusis. “Jaunuos dzīsmis ir dzīduošonys procesa rezultats, rodūt dzeivu i myusdīneigu vieršonūs iz latvīšu tradicionaluos kulturys īdvasmuotu skotivis muokslu. Itaida pīeja ļaun jaunīšim daudzi plotuok pīdzeivuot i izprast tradiceju – na tik doncojūt, bet i dzīžūt, kūpā izzynojūt i svietejūt svātkus,” pastreipoj Lilija Lipora. “Dārdari” tur nūceju, ka ar jaunū dzīsmi īprīcynuos klauseituojus i paleidzēs radeit eipašu nūskaņu, sagaidūt Lelū dīnu i pavasara atīšonu.

*Dzīsme publicāta ar nūsaukumu “Karit broļi šiupuļeitis”, bet jimā ir tik daudzi klaidu, ka portals lakuga.lv atsaļuove pīraksteit korektā latgalīšu volūdā i aicynoj iz prīšku muziķus i cytus dzīšmu izpiļdeituojus pasaceņst īvāruot latgalīšu rokstu volūdys nūsacejumus kai dzīšmu nūsaukumūs, tai vuordūs. Paleidzeibys vysod var praseit kai portalam lakuga.lv (rokstūt info@lakuga.lv) voi Vaļsts volūdys centra latgalīšu volūdys lingvistei Mārai Mortuzānei-Muravskai (rokstūt mara.mortuzane-muravska@vvc.gov.lv).

“Cylvāka bārna” motivi i LRF

Mieneša laikā divejus jaunus skaņdorbus publiciejs latgalīšu repa apvīneibys “LRF” dalinīks Idzha (voi eistajā vuordā Igors Prikulis) ar saknem nu Ludzys pusis, kū labi var dzierdēt ari juo repa partejuos. Martā muokslinīks publiciejs divejus jaunus skaņdorbus – “Cylvāks”, kurā var dzierdēt ari napaseņ myužeibā nūguojušuo režisora Juoņa Streiča legendaruos kinys “Cilvēka bērns” motivus, i “As i tu”. Dzīsmē “Cylvāks” Idzha sasadorboj ar reperi 2oyEtazh. Vaira par Idzhu var izzynuot portala lakuga.lv rokstā ITE.

Ūga apvīneibā “Vētra KRŪ”

Hiphopa festivals “Straume”, kas itūgod jau pīktū godu 3. i 4. julī byus “Zeit” rodūšajā kvartalā Cāsu nūvoda Leigatnē, izziņojūt ituo gods fesivalu, paviestejs, ka četrys hiphopa muokslineicys apsavīnuojušys projektā “Vētra KRŪ” i ar eipašu prīšknasumu izastuos festivalā. Sūpluok ar reperem Viņa, Krisy, Revolūcija projektā pīsadola ari latgalīšu hiphopa muokslineica Ūga. Kai viestej informaceja, jaunajai apvīneibai tūp kūpdzīsme ar reperi Gustavo. Pārņ kūpā ar Revolūciju i Veideru Ūga pīsadaleja ari reperis Viņa dzīsmē “100”.

Jubileja koncerts Sutrūs

Marta vydā iz sovu jubileja koncertu Leivuona nūvoda Sutrūs aicynuoja dzīšmu autors i izpiļdeituojs Aņss Ataols Bierzeņš. Niu koncerta video īroksts video socialajā medejā YouTube ir daīmams kotram nūsavērt grybātuojam. Portala lakuga.lv skaiteituoju ierteibai jū dalīkam ari marta muzykys jaunumu rokstā.