Muzykalī jaunumi: sīviškeiguo jauda hiphopā i harizmatiskī Daugovpiļs koristi
Rokstu sagataveja: portals lakuga.lv
Latgalīšu hiphopa puorstuovei Ūgai jauna sadarbeiba, sovpus Daugovpiļs tymsi zyluo kora daleibnīki klauseituojim pīduovoj slovonū Stinga dzīsmi “Englishman in New York” latgaliski.
VIŅA, Ūga i Revolūcija apsavīnoj energiskā dzīsmē “100”
Pyrmū reizi Latvejis muzykys viesturē kūpeigā dzīsmē apsavīnuojušys treis hiphopa izpiļdeituojis – VIŅA, Ūga i Revolūcija. Dzīsme “100” ir pylna ar sīviškeigu jaudu, energeju i stuosta par ambicejom, originalitati i personeigū izaugsmi.
Latvejis Radejis 5 raidejumā “REPortāža” dzīsmis idejis autore VIŅA stuosta, ka suokuse struoduot pi dzīsmis i saprotuse, ka beidzūt Latvejis hiphopa pasaulī ir daudz vaira sīvīšu izpiļdeituoju, deļtuo byutu breineigi sasavuokt kūpā i sataiseit kaidu singlu. Sovpus Ūga atzeist, ka bītmeikera Veidera bīts jai pasalics cīši jaudeigs i jei izreiz pīkrytuse sadarbeibai: “Es nabeju da šam pazeistama ni ar Veideru, ni DJ Monstu, maņ tei ir ari īsapazeišona, VIŅA tai kai savīnoj tyltus.”
Dzīsmis videoklipa autors ir Eduards Deičmanis, i izpiļdeituojis tymā īsajutušys vesterna dumpinīču tālūs. Dzīsmi “100” produciejs bītmeikers Veiders i miksiejs DJ Monsta.
Daugovpiļs tymsi zyluo kora puiši pīduovoj dzīsmi “Latgalīts Reigā brauc”
Kai viestej Daugovpiļs tymsi zyluo kora puorstuovi, kors dzīsmi “Latgalīts Reigā brauc” veļtej vysim latgalīšim, kuri atsarūn ceļā nu Latgolys iz Reigu. Dzīsmei sataiseits ari videoklips, kurs īturāts jautrys parodejis stylā, raugūt dareit piec tai sauktūs boibendu parauga, par pīmāru, “Backstreet Boys”, “One Direction”. Ideja taidai parodejai rodusēs jau 2020. godā, kod dzīsmi izpiļdeja grupys “Bez PVN” i “Dabasu Durovys”.
Legendarū angļu dzīduotuoja Stinga dzīsmi “Englishman In New York” sovulaik latgaliski puortulkuoja i kūpā ar draugim īskaņuoja Terentijs Dunskis, i 90. godūs tei skanēja Latvejis Radejis 4 Latgolys programā.
Dzīsmis īrokstā pīsadaleja Aleksandrs Grohoļskis, Arņs Slobožanins, Matīss Lojāns, Juoņs Soms, Amanda Lapa. Pavadūšuo grupa – Vladimirs Šuvalovs, Māris Veliks, Valdis Rundzāns, Aleksandrs Tamans. Dzīsmi miksēja Armands Treilihs. Videoklipu fiļmēja i montēja Ivars Utināns.
