Rokstu sagataveja: portals lakuga.lv

Pi skaiteituoju tics žurnala “A12” apreļa/maja numers, i tymā var puorskaiteit intervejis ar Latgalīšu kulturys goda bolvys “Boņuks 2025” myuža bolvys sajiemieju Rutu Cibuli, lauku uzjiemieju Jolantu Smani, dirigenti Anitu Zarāni i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce tuo īvodā roksta: “Kotrys nu myusu ir sova pasauļa duorzinīks, kotrā snauž voi jau deigst naskaitomi pupuri i zori, daži radzami, cyti nūgluobuoti pat nu pošu skota. Dažus kūpam apzynuotai, cytus pamatam liktiņa ziņā, vēļ cytus naīvārojam vyspuor. I vystik tī vysi ir daļa nu myusu īškejuo duorza, kas pamozam veidoj tū, kas asam i kū spiejam dūt cytim. Duorza kūpšona prosa drūsmi, pacīteibu i dorbu, tok taišni myusu rūkuos ir padareit itū dzeivuošonu kruosainuoku, jāgpylnuoku i prīceiguoku.”

Pavasarī, laikā, kod doba pasamūst i cylvākūs otkon izplaukst cereiba iz jaunom suokom, žurnals “A12” aicynoj īraudzeit spāku cylvākūs i jūs paraugā. Itys numers ir par drūsmi dareit lelys lītys mozuos vītuos, par naatlaideibu i spieju nūticēt sovom idejom:

• Vuoka personeiba ir kulturys darbineica Ruta Cibule, “Boņuka 2025” bolvys par myuža īguļdejumu latgalīšu kulturys atteisteibā sajiemieja. Saruna par dzeivi, idejom i spieju skubynuot ļauds iz dareišonu.

• Intervejā ar Jolantu Smani atsakluoj spieceigys kūpīnys pīmārs i stuosts par cylvākim, kuri ar sovu dorbu styprynoj vītejū vidi.

• Kūktieļnīks Raitis Styuka par eksperimentim tieļnīceibā i kūkgrīzumūs – kai drūsme realizēt sovys īceris paleidz atsabreivuot nu bezjiedzeibys sajiutys.

• Muzykys puslopuos stuosts par goda dirigenti Anitu Zarāni i juos ceļu muzykā.

• Tradiceju sadaļā – Nautrānu kulturtelpys ceļa molys krysti.

• Ceļš kūpā ar Juri Kulakovu, kas atkluoj Latgolu nu cyta skotpunkta.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – portala redaktore Laura Melne ir autore rokstam par Nautrānu kulturtelpys krystim, sovutīs žurnaliste Edeite Laime – intervejai ar metalmuokslinīku i Cāsu bāra “Vokur” saiminīku Pēteri Ločmeli. Taipat īrostai žurnalā puorskaitoma portala redakcejis sagataveituo informaceja par jaunuokajim gruomotu i muzykys izdavumim.

Žurnals “A12” izīt sešys reizis godā i turpynoj byut sarunu bīdrys tim, kam svareiga Latgolys kultura, cylvāki i dzeiva dūmuošona. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.