Rokstu sagataveja: portals lakuga.lv

Lobs.lv ir bīdreiba i medejs, kas dorbojās jau septeitū godu. Pavysam naseņ, marta beiguos, portals ir dabuojs jaunu izskotu. Portalā lobs.lv teik publicātys dažaida satura viests, kas saisteitys ar Latgolu, tuos cylvākim, kulturu, dobu i vysaidom nūtikšonom.

Ideja par portala izveidi žurnalistei i portala lobs.lv leidza veiduotuojai Egitai Terēzei Jonānei roduos 2018. godā žurnalistikys školā Daugovpilī. Jonāne pastreipoj, ka nūzeimeigu īdviesmi snēdze itamā školā satyktuo lektore BBC Krīvejis nūdalis žurnaliste Olesja Gerasimenko: “Jei daudz stuosteja par tū, ka ari mums pošim ir juobyut styprim, spieceigim žurnalistim, juospiej īt sovu ceļu, nasaverūt iz varys spīdīni i puormaiņom pasaulī. Radeit ideju i saturu mums izadeve kūpā ar Raivi Malnaču, i īcarātais guoja raiti. Vyss tyka dareits pošu spākim, bez projektu finansiala atbolsta. Itūšaļt regionalajim medejim ir daīmams medeju digitalizacejis projektu finansiejums, kuram pasasokūt, portalam ir rodusēs jaunuo verseja. Portals grib paruodeit, ka tehnologejom ir juokolpoj cylvākam, na ūtraižuok.”

Portala lobs.lv mierkis ir na tik informēt, bet ari izgleituot, īdvasmuot i aktīvi īsaisteit skaiteituojus satura veiduošonā. Jau itūšaļt portala socialūs medeju kontūs var redzēt portala skaiteituoju īsyuteituos biļdis ar Latgolys dobys skotim, piļsātu ainovom i kasdīnys šaļtim, kas atspīgeļoj regiona skaistumu i daudzveideibu. Īsasaisteit eipaši aicynuoti Latgolys dzeivuotuoji, tok portala mierkauditoreja ir plota – kai Latgolys, tai ari kaimiņu nūvodu dzeivuotuoji i vysi, kam Latgola i tuos stuosti ir tyvi. Lai kūpā veiduotu portala saturu ar sovim stuostim, esejom, īrūsynuojumim, vaicuojumim, fotokarteņom, video, dzīsmem voi puordūmom, interesenti ir aicynuoti raksteit iz e-postu lobspasts@gmail.com vai sasazynuot, rokstūt iz telefona numeri 28344018 (WhatsApp).

Portala koordinatore ir žurnaliste Egita Terēze Jonāne, i cytu štata autoru portalā itūšaļt nav. Portals apzynuotai veiduots kai platforma, kur golvonais bolss pīdar pošim skaiteituojim – cylvākim, kuri grib daleitīs ar sovu pīredzi, dūmom i rodūšū veikumu. Kab tū eistynuotu, portalam jau izveiduota sadarbeiba ar vysaidu jūmu puorstuovim, kuri roksta par sev nūzeimeigom tēmom. Jūs vydā ir, pīmāram, politiks Dāvids Rubens, zyrgkūpe Madara Soma, kai ari Latgolys prīsteri i dobys entuziasti. Portala redziejums bolstuos puorlīceibā, ka vierteigs ir vyss, kū cylvāks roda, izmontojūt sev dūtuos spiejis – bolsu, vuordu, muzyku i puorejūs dūtumus.

Egita Terēze Jonāne nūruoda: “Autori byus dažaidi. Maņ ir dūma īsaisteit vaira ari jaunīšus, kuri latgaliskū izgaršoj ar sirdi i pruotu. Itys portals ir Latgolai i Latgolys cylvākim. Es kai žurnaliste ite asu vaira kai sauciejs, bet latgalīši lai poši stuosta, poši roksta, poši dzejoj. Ka Dīvs dūs maņ nūdzeivuot ilgi, ceru ikkotru latgalīti īsaisteit lobs.lv portala pasaulī!”

Portala sātyslopā daīmamys publikacejis i roksti vīnpadsmit dažaiduos apakškategorejuos – “Radošā Latgale”, “Ziņas”, “Par vietu, cilvēku, Dievu”, “Pastāsti kaut ko labu”, “Mūsu novadnieks”, “Lobs.lv iesaka”, “Mākslas kabata”, “Tev tur jābūt!”, “Lasītāju klubs”, “Kafijpauze” i “Fotostāsti”. Kotra nu kategoreju nūdrūsynoj daudzveideigu i interesantu saturu, kas uzrunoj dažaidys auditorejis grupys. Attaisūt portalu, navar napamaneit tuo pozitivū nūskaņu, kū aplīcynoj kai pats portala nūsaukums, tai i tuo moto – “Viens labs stāsts katrai dienai”. Vīns nu Lobs.lv mierku ir īsaisteit sarunā Latgolys kūpīnu i paruodeit kotra rodūšumu vysaidūs formatūs.

Itūšaļt portalā publicātais saturs puorsvorā ir latvīšu literarajā volūdā, tok sūpluok tam atrūnamys i atseviškys publikacejis latgalīšu volūdā. Portalā ari iz prīšku byušūt vaira rokstu latvīšu literarajā volūdā, lai pastreipuotu tū kai vīnojūšū volūdu: “Maņ gribīs, lai itys portals ir vysim latgalīšim, ari tim, kuri narunoj latgaliski. Maņ ir taida lela gribiešona vīnuot, na koč kū nūškiert. Es grybu, lai latvīšu volūda skaņ, lai tei myus vīnoj. Bet roksti latgaliski ari byus – ka kaids grib īsnēgt portalam rokstus latgalīšu volūdā, tū drūsai var dareit. Vystik maņ redzīs, ka ar rokstu veiduošonu latgaliski itūšaļt jau cīši labi teik golā portals lakuga.lv – capuri nūst!”

Lai īdvasmuotu i pīsaisteitu jaunus portala lobs.lv skaiteituojus i raksteituojus, Egita Terēze Jonāne nūsauc treis īmesļus, deļkuo portals byutu juoskaita: tymā ir naīrosts i interesants saturs; portals rūsynoj īsasaisteit i daleitīs ar sovu personeigū pīredzi; kotrys eistyns latgalīts ir i lobs cylvāks, i lobs.lv ir eistuo vīta, kur jim sasatikt.

Egita Terēze Jonāne soka paļdis vysim, kuri ir īsasaistejuši portala lobs.lv darbeibā: “Sirdssylts paļdis munim meilajim, kas atbolsta i lutynoj. Sirdssylts paļdis Latgolys cylvākim, kuri ar sovu rodūšumu saimē, dorbā i svātkūs apduovynoj pasauli. Sirdssylts paļdis rodūšajai tekstu redaktorei Diānai Bravackai, rodūšajam digitalūs reiku puorvaļdnīkam Raivim Malnačam, rodūšajai projekta vadeituojai Signei Kraulei, rodūšajai IT guru newblack komandai. Sirdssylts paļdis rodūšajai “Vietējās Latgales Avīzes” saimei, kas mani īdvasmoj kasdīnā i tikpat rodūšajai Latvejis regionalūs medeju asociacejis saimei. I sirdslelais paļdis vysim, vysim, kuri atbolsta ar īsaisti, padūmu, sirsneibu i zīduojumim – portals dorbojās bez reklamu!”