Latvejis koncertturu izsuoks Slavanais Jersikys orkestris
Ar jaunu muzykalu projektu „Slavanais Jersikys orkestris” turā pa Latveju brauks televizejis šovūs popularitati dabuojušī bruoli Atis i Juoņs Auzāni, kas ir ari ituos sezonys šova „Dzīdūšuos saimis” vadeituoji, Oranžuo kora dzīduotuoji, kai ari lobuokī Latvejis muziki.
Jaunuo koncertture turpynuos pārnuo goda veiksmeigi aizsuoktuo muzykaluo projekta „Rokasspiediena attālumā…” tradicejis – koncerta skaniejumu taiseis tik „dzeivī” steigu, tausteņu, pyušamī i sytamī instrumenti, bruoļu Auzānu sirsneigais dzīduojums i energiskī i latgaliskuos guņs pylnī Oranžuo kora dzīduotuoji.
Koncerta muzykalū pavadejumu taiseis interesants, kūpskaitā vaira nakai divdesmit dažaidu instrumentu salykums: gitarys, kontrabass, klavīris, akordeons, pyušamī instrumenti, sytamī instrumenti i lels perkuseju kluosts, rodūt natipisku skaniejumu. Koncertā vyss byus eistyns – pat klavīris, kurys orkestris ir apsajiems voduot leidza iz vysim pīcdesmit koncertim.
Sūpluok obeju bruoļu Auzānu dzīduojumam, byus dzieržami ari Oranžuo kora dzīduotuoji Anita Levša, Olga Stupeņa, Inta Ļaksa, Sergejs Ivanovs i Jurs Vucāns, kai ari pavadūšūs muziķu sastuovs: Ēriks Upenīks (gitarys, bandžo), Viktors Veličko (kontrabass), Nauris Bartusevičs (sytamī instrumenti), Juoņs Lemežis (klavīris, saksofons), Kaspars Stankevičs (trompete, perkusejis), Sergejs Ivanovs (akordeons).
Programā īkļautys tautā īmeiļuotys melodejis Ata Auzāna aranžejumā latvīšu, latgalīšu, angļu, vuocu, spāņu i portugaļu volūdā: „Atkal līst”, „Difference”, „Latgalei”, „Man šodien 18 gadu”, „Muote dieleņu auklieja”, „Tumša nakte zaļa zāle”, „Start wearing purple”, „Debesis ir tuvu klāt”, „Ripo tvaika bānītis”, „Čili baba”, „Puķu pārdevēja”, „Aijas smaids” i c.
Tyvuokī „Slavanuo Jersikys orkestra” koncerti Latgolā paradzāti:
26. oktobrī Varakļuonūs
27. oktobrī Krystapiļs Kulturys nomā
2. novembrī Bolvūs
19. novembrī Vilekī
22. novembrī Preiļūs
24. novembrī Ludzā i Rēzeknē
6. decembrī Leivuona Kulturys centrā
Biletus iz koncertim nūpierkt i sekuot leidza koncertturei var „Biletu paradizis” kasēs ci škārsteiklā ITE.
