Grupa “Kaligo” ar dzīsmi latgaliski tykuši konkursa “Supernova” finalā
Rokstu sagataveja: portals lakuga.lv
Pyrmū reizi Eirovizejis dzīšmu konkursa nacionalajā atlasē latgalīšu volūda izskanēja 2008. godā grupys “Borowa Mc” i Kristapa Rasima izpiļdejumā dzīsmē “The One”. Atguoduot tūs laikus var, nūsaklausūt stuostu ITE. Tok niu latgalīšu volūdai daguojuse ūtrei reize, i dzīsmi “Raganeņa” dasoka grupa “Kaligo”. Dzīsmē apsavīnoj jaunys mārgys stuosts par ritualū transformaceju ar smoguos muzykys nūskaņom i pasauļa muzykys elementim.
Dzīsmis “Raganeņa” muzykys autors ir Kristaps Karps, teksta autore – Diāna Logina, aranžejumu taisejuse grupa “Kaligo”. Tei īraksteita studejā “KS Records”, skaņu režisors Kārlis Šteinmanis. Itei dzīsme grupai eipaša ar tū, ka na tik muzyka, bet ari teksts ir pošu radeits. Par itū jaunū izaicynuojumu vaira stuosta dzīsmis teksta autore i grupys bolss Diāna Logina: “Tai kai dzīsmis muzykalais materials topa pyrma vuordu, raudzeju nūgiut tuo nūskaņu. Sajutu, ka jaudeigajai muzykai vajadzeigs tikpat styprys teksts, partū izalaseju radeit stuostu par raganeņu. Eistī vuordi da mane atguoja latgalīšu volūdā, kas nav puorsteigums, jo tei ir muna dzymtuo volūda, kurā jiutūs vysbreivuok. Stuostu izbyuru ap Juoņu laiku, kod dobys spāks ir pylnbrīdā. I tai roduos dūma par mārgu ar zaļom acim, kura sajiut spieceigu aicynuojumu īt dobā pi augu, pi iudiņa, taiseit vysaidys darbeibys i ļautīs ritualam. Myusu raganeņa nav ni loba, ni švaka – jei tikū dabuojuse spāku i nav zynoms, kas nūtiks tuoļuok.”
Tok muzykys autors Kristaps Karps par dzīsmi soka tai: “Itei kompoziceja myusu dzīšmu pyurā nūgulēja divejus godus. Kod raudzejom tū pyrmū reizi atteisteit, suocem pamatideju maineit, likt kluot vēļ vysaidus seikumus, bet nazkas tymā vysā nasalepēja kūpā, tai jū ari da gola nanūvedem. Piec puortraukuma vystik raudzejom itū dzīsmi izdūt, i izdūmuoju sovu ideju pamest taidu, kaida jei beja suokumā īcarāta. Redzīs, ka tys ir pīruodejums, ka kotrai dzīsmei ir sovs eistais laiks. Muzykali itū dzīsmi raksturuotu kai energejis luodeņu, kurā sasavyn tradicionaluos muzykys īdvasmuotys nūskanis ar myusu dīnu roka skaniejumu.”
“Kaligo” ir latvīšu grupa, kas dybynuota 2023. godā. Pa itū laiku izdūts debejis aļbums “Pirmais Pērkons”, vairuoki singli, kai ari aizvadeiti vysaidi koncerti i festivali. Ituo gods majā grupa gasteja Pūlejis leluokajā studentu festivalā “Varsonalia”, kas nūtyka Varšavā. Grupys sastāvā muzicej Diāna Logina (bolss, vysaidi instrumenti), Marita Karpa (akordeons), Roberts Jakubovskis (gitāra), Kārlis Bērziņš (tausteņinstrumenti), Juoņs Narbuts (basgitara) i Kristaps Karps (bungys, perkusejis, bolss). Jūs repertuarā ir latvīšu tautysdzīšmu apdaris, pasauļa muzyka i folklorys īdvasmuota originalmuzyka. “Kaligo” sovā dailradē spielejās ar vysaidu žanru elementim, taisūt eklektiskys apdaris i originaldzīsmis, kuruos sasavīnoj folkmuzyka, popularuos muzykys elementi i smoguos muzykys energeja.

Komentari