13. decembrī 11.00 Kuorsovys nūvoda Malnovys cīma maizneicā “Dzīles” teik reikuotys suprātkys, kas veļteitys Zīmys saulgrīžu tradicejom, informej Kuorsovys nūvoda turisma organizatore Inga Bernāne. Kūpā ar saimineicu Ainu gosti meistaruos puzurus i gatavēs gordys piparkūkys svātku goldam.

Kulturys zeimis “Latviskais mantojums” nesieja maizneica “Dzīles” Zīmys saulgrīžu gaideišonys laikā sovim apmaklātuojim pīduovoj izzynuot mitologiskūs puzuru veiduošonys nūslāpumus, kai ari tūs spāka stuostu i nūzeimi Latvejis kulturviesturiskajā montuojumā. Kab ustobu pīpiļdeitu na tik ar latvyskuos dzeiviszinis stuostejumu, nu ari ar Zīmyssvātku smuordu i garšu, suprātku laikā kūpā tiks captys i rūtuotys piparkūkys.

Lauku turisma asociaceja “Lauku ceļotājs” 27. novembrī maizneicai “Dzīles” daškeira kulturys zeimi “Latviskais mantojums”. Latvyskuo montuojuma zeime teik padūta Latvejis turisma uzjiemiejim, kurī sagloboj i daudzynoj latvyskū kulturys montuojumu, ruodūt tū apmaklātuojim. Piec ituos zeimis var atpazeit vītys, kur saiminīki apmaklātuojim ir gotovi ruodeit i stuosteit, mīluot ar latvyskim iedīnim, vuiceit omotus i prasmis, svieteit latvyskūs svātkus.

Daleiba pīaugušajim ir 7 eiro i bārnim – bez moksys. Vaira informacejis i dasasaceišona, zvonūt 26538016 (Aina Barsukova).

Suprātkys ir seneja latvīšu tautys sadzeivis tradiceja, kod ļauds zīmys vokorūs saguoja kūpā, kab pulkā i pastruoduotu, i pasaprīcuotu. Dorbs te mejuos ar dzīsmem, meikļu miniešonu, jautrom rūtaļom i dejom.