Bolvu Kulturys i atpyutys centrā nu 1. apreļa apsaverama gleznuotuojis Agrys Ritinis gleznu izstuode “Dobys portrets” (Dabas portrets). Muokslineicys personalizstuodis ir ceļuojušys gon pa Latveju, gon uorā nu tuos rūbežim. 25. majā 17:00 Bolvu Kulturys i atpyutys centrā byus vareiba sasatikt ar pošu gleznuotuoju.

Gleznuotuoja Agra Ritiņa dzymuse 1975. godā Ludzā. 2004. godā īgivuse magistra gradu muokslā (gleznīceibā) Latvejis Muokslys Akademejā. Vuicejusīs multivizualuos gleznīceibys darbneicā pi profesora Kaspara Zariņa i profesora Alekseja Naumova. Nu 1997. goda muokslineica pīsadola dažaiduos izstuodēs, plenerūs, konkursūs. Juos dorbi atsarūn Latgolys Kulturviesturis muzejā Rēzeknē i Ludzys Nūvodpietnīceibys muzeja eipašumūs, kai ari privatkolekcejuos Latvejā, Danejā, Vuocejā, Norvegejā, Italejā, Anglejā.

Muokslineica izkūp golvonūkuort oleja gleznīceibys tehniku iz audakla i kūka, breivi reikojās ar formatu, jai tyva ainava. Vizualajā interpretacejā pasauļs ir laukusm, kū muokslineica roda kruosu, formu i lineju, iztverūt kūkus, zīdus, ūgys, kaštanus, tauriņus, leitu, kai ari cytys paruodeibys i lītys kai ornamentu, kas ir dobys naatjamama sastuovdaļa i ar sovu individualitati pīsatyvoj koč kam universalam. Dorbi ir kai mozi fragmenti nu dobys, nu zemis i nu dabasu, nu kūkim i mežim, nu kruosys i linejis, nu lopys i nu tuos kuoteņa, nu ceļa i pļovys, nu izjiutom i sajiutom, konkretys šaļts emocejom. Kūpejū nūskonu īgiust veiksmeigi apvīnojūt nūsaceitu kruosu laukumu i papildynojūt tūs ar grafiskūs lineju ritmim.