Latgolā radeits jauns projekts “Puormeit pasauli”, kas sītspīdis apdrukys tehnikā roda T-kraklus ar latgaliskim uzrokstim, kotrā vuordā globojūt stuostu par identitati, pīdareibu i volūdu, informej projekta autori.

“Mes ar itū projektu grybom runuot par sovu dzymtū volūdu. Par tuos nūzeimi myusu dzeivē. Mes grybom, kab tei skaņ, dzeivoj i ir daļa nu myusu kulturys. Laikā, kod suocem veiduot kraklus, mums ruodejuos, ka latgalīšu volūda pavysam nadaudz atsaškir nu latvīšu literaruos volūdys, nu sovā byuteibā ir taida poša. Mums pošim beja puorsteigums, kod tykom pi sajiutys – nā, tei ir cīši eipaša volūda! Tei ir cīši atškireiga. Cīši dziļa. Tei ir myusu volūda. Tys nav stuosts par kraklim, tys ir stuosts par sevis apsazynuošonu,” soka projekta autori.

Itūšaļt pastuov divejis dažaidys itūs kraklu serejis. Pyrmū T-kraklu sereju rūtoj uzroksti ar vuordim latgaliski i tūs tulkuojumu latviski, kas paruoda, cik cīši obejis ituos volūdys atsaškir, pastreipojūt tū, ka latgalīšu volūda ir sovpateiga i dziļa. Ūtrajā kraklu serejā ir frazis, teikumi latgaliski, kas sovā byuteibā ir naatkuortojami i vīnkuorši aicynoj svieiteit dzeivi.

Kotram ir sovs eipašais stuosts par Latgolu i tuos cylvākim. Par speiteigū, sovpateigū i tik atškireigū vītu Latvejis kartē i tuos cylvākūs. Latgalīšu volūda ir dzymtuo volūda apmāram 165 000 cylvāku, kas dzeivoj Latgolys regionā i citur vysā pasaulī. “Puormeit pasauli” ir sovs stuosts, kai ļaut volūdai dzeivuot, skanēt i byut daļai nu kasdīnys.

Vaira informacejis: “Puormeit pasauli” Facebook lopā.