Itei nedeļa teik aizvadeita Latgolys kongresa symtgadis zeimē. Ari raidejums “Pi myusim Latgolā” sekoj leidza nūtikšonom i apkūpoj redzīņus. Itūreiz Latgolys symtgadis kongresa viertiejumā ar Lauru Sondori-Strodi dalejuos Ivars Graudiņš.

Ivars Graudiņš ir Fraņča Trasuna bruoļa mozmozdāls. Jis dzimis Zvīdrejā, lelu daļu dzeivis pavadejs ASV, atsagrīzs pi senču sakņu i dzeivoj Latgolā.

Ivars Graudiņš cīši lepojās ar sovu dzymtu i eipaši nūviertej Fraņča Trasuna darbeibu i īguļdejumu Latgolys atteisteibā. Taišni deļtuo jis izjiut atbiļdeibu dasadaleit vaļstiski nūzeimeigūs pasuokumūs, kai ari Latgolys kongresa symtgadei veļteitūs pasuokumūs.

Koč i Latgolys symtgadis kongress pādejūs mienešu laikā cīši izdaudzynuots, Ivars Graudiņš ir nūskaņuots skeptiski i tū nūsauc par sabīdrisku čaja dzeršonu ar capumim. Pamatojūtīs iz tū, ka 1917. goda Latgolys kongresā pījimtī lāmumi da šam nav eistynuojušīs dzeivē, Graudiņš nalīk eipašys cereibys, ka niu kas varātu pasameit.