Rokstu sagataveja: portals lakuga.lv

24. novembrī 19 stuņdēs Daugovpiļs teatrī pyrmizruodi pīdzeivuos Nikolaja Gogoļa lugys “Revidents” īstudiejums latgaliski “Revidents Sylagolā”. Lugys režisors ir Olegs Šapošņikovs, tū Latgolys realejom adaptiejuse rakstneica i dramaturge Monika Zīle. Izruodē kūpā ar Daugovpiļs teatra akterim pīsadaleis Juoņs Jarāns i Roberto Meloni.

Nikolaja Gogoļa luga “Revidents” ir 1835. godā pīraksteita komedeja, kuru tuos autors uztvēre kai atteirūšu satiru i īrūci ceiņā pret tūšaļt pastuovūšū nataisneibu – amatpersonu attīksmi pret jūs pīnuokumim i lykuma izpiļdi. Izruodis “Revidents Sylagolā” rodūšuo komanda ir puorlīcynuota, ka N. Gogoļa komedejis viestejums šudiņ ir tikpat aktuals kai tuo topšonys saļtī.

Daugovpiļs teatra īstudiejumā Gogoļa lugys nūtikšonys izavierš myusu dīnuos kaidā Latvejis proviņcis piļsieteņā Sylagolā, kurā dzeivojūšuos amatpersonys satrīc ziņa, ka dreizumā da jūs varātu atbraukt revidents. Tymā pošā šaļtī kaidā nu vītejūs vīsneicu apsamat divi aizdūmeigi kungi.

Izruodis ideja ir paruodeit na tikai varys natykumus, bet ari cylvāku, kurs tics pi varys, par izruodi soka tuos režisors O. Šapošņikovs, pībylstūt: “Vaine nav ni vaļsts īkuortā, ni tauteibā, ni laikmatā, kurā dzeivojam. Vyss ir atkareigs nu tuo, ci eksistej personeibys gareigais pamats. Teikūt pi varys, cylvāks pījam lāmumu, kam jis kolpuos – sovim personeigajim mierkim ci augstuokim idealim. Ar sovu izruodi mes gribim atguodynuot taišni par itū.”

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.